ابرار الحق نے برطانیہ میں کنسرٹ ملتوی کیوں کیا؟ وجہ سامنے آگیا

پاکستانی گلوکار ابرار الحق نے اسلام آباد کے پاکستان انسٹی ٹیوٹ آف میڈیکل سائنسز (پی آئی ایم ایس) کی نرسری میں پیش آنے والے المناک واقعے کے بعد برطانیہ کے شہر مڈلزبرو میں ہونے والا اپنا کنسرٹ ملتوی کردیا۔

ابرار الحق نے معصوم جانوں کے ضیاع پر گہرے دکھ اور افسوس کا اظہار کرتے ہوئے کہا کہ کنسرٹ ملتوی کرنے کا فیصلہ سانحے کے متاثرین اور ان کے اہل خانہ کے احترام میں کیا گیا ہے۔

منتظمین کے مطابق مڈلزبرو کنسرٹ اب ستمبر میں منعقد کیا جائے گا، جبکہ پہلے سے خریدے گئے ٹکٹس نئی تاریخ کے لیے بدستور قابلِ استعمال ہوں گے۔

واضح رہے کہ 26 اگست کو اسلام آباد کے پی آئی ایم ایس کی نرسری وارڈ میں علی الصبح آگ بھڑک اٹھنے کے نتیجے میں 14 نومولود بچے جاں بحق جبکہ متعدد دیگر شدید جھلس گئے تھے۔ واقعے کے بعد ملک بھر میں سوگ اور غم کی فضا پیدا ہوگئی۔

یہ بھی پڑھیں: پمز سانحہ، وزیراعظم کی کمیٹی کی عبوری رپورٹ تیار، تہلکہ خیز انکشافات

سانحے پر پاکستانی شوبز سے وابستہ متعدد شخصیات نے بھی گہرے دکھ اور غم کا اظہار کرتے ہوئے ذمہ داروں کے خلاف کارروائی کا مطالبہ کیا۔ ان شخصیات میں سعدیہ امام، جویریہ سعود، سویرہ پاشا اور مہر بخاری سمیت دیگر شامل ہیں۔

دوسری جانب بعض پاکستانی فنکاروں نے متاثرین کے ساتھ مبینہ ناروا سلوک پر وزیر صحت مصطفیٰ کمال کے طرزِ عمل پر بھی تنقید کی ہے۔ بشریٰ انصاری، سیمی راحیل، سحر ہاشمی اور عمران عباس سمیت دیگر فنکاروں نے پی آئی ایم ایس سانحے کے متاثرین کے ساتھ مبینہ برتاؤ پر اپنے تحفظات کا اظہار کیا۔