By ای پاسپورٹ حاصل کرنے یا موجودہ پاسپورٹ کی تجدید کے خواہشمند شہریوں کے لیے اہم سہولت متعارف کرانے کا فیصلہ کیا گیا ہے۔
حکام کے مطابق 7 ستمبر سے ملک بھر میں قائم نادرا سینٹرز پر شہریوں کو ای پاسپورٹ کی تجدید اور دوبارہ اجرا، یعنی ری پرنٹ کی سہولت فراہم کی جائے گی۔ اس اقدام سے شہریوں کو پاسپورٹ سے متعلق بعض خدمات کے لیے مخصوص پاسپورٹ دفاتر کے بجائے اپنے قریبی نادرا مرکز سے رجوع کرنے کی سہولت حاصل ہوگی۔
یہ بھی پڑھیں :پاسپورٹ ڈلیوری کائونٹرز کے اوقات کار تبدیل ، ہفتہ کو بھی کھلے رہیں گے
ذرائع کے مطابق کراچی سمیت ملک کے مختلف شہروں میں موجود نادرا سینٹرز پر ای پاسپورٹ کی تجدید اور ری پرنٹ کی درخواستیں وصول کی جائیں گی۔ یہ سہولت محکمہ پاسپورٹس اور نادرا کے درمیان طے پانے والے معاہدے کے تحت فراہم کی جا رہی ہے، جس کا مقصد شہریوں کے لیے پاسپورٹ سے متعلق خدمات کو مزید آسان اور قابل رسائی بنانا ہے۔
حکام نے واضح کیا ہے کہ نئے ای پاسپورٹ کا پہلی مرتبہ اجرا اور نئے مشین ریڈایبل پاسپورٹ کے حصول کا موجودہ طریقہ کار بدستور برقرار رہے گا۔ ان خدمات کے لیے شہریوں کو حسب سابق پاسپورٹ دفاتر سے رجوع کرنا ہوگا۔ تاہم نادرا کے میگا سینٹرز میں پہلے سے قائم پاسپورٹ کاؤنٹرز کے ذریعے نئے ای پاسپورٹس اور نئے مشین ریڈایبل پاسپورٹس کے اجرا کی سہولت موجودہ طریقہ کار کے مطابق جاری رہے گی۔
ذرائع کے مطابق نادرا کے مختلف دفاتر میں قائم موجودہ پاسپورٹ کاؤنٹرز کو مرحلہ وار ختم کرنے کا بھی منصوبہ ہے۔ اس عمل کے تحت ان کاؤنٹرز پر تعینات پاسپورٹ عملے کو واپس متعلقہ محکمے میں بھیجا جائے گا۔ تاہم نئی سہولت کے تحت نادرا سینٹرز سے ای پاسپورٹ کی تجدید اور ری پرنٹ کی خدمات دستیاب رہیں گی۔
حکام کا کہنا ہے کہ اس اقدام کا بنیادی مقصد شہریوں کو ای پاسپورٹ کی تجدید کے لیے زیادہ آسان رسائی فراہم کرنا اور پاسپورٹ دفاتر میں بڑھتے ہوئے رش کو کم کرنا ہے۔ نادرا سینٹرز کا ملک گیر نیٹ ورک شہریوں کو اپنے قریبی مرکز سے یہ سہولت حاصل کرنے میں مدد دے گا، جس سے دور دراز علاقوں سے پاسپورٹ دفاتر کا رخ کرنے والے افراد کو بھی ریلیف ملنے کی توقع ہے۔
یہ بھی پڑھیں :بیرون ملک مقیم امریکی شہریوں کے لیے پاسپورٹ تجدید کی اہم سہولت متعارف
