بیرون ملک مقیم امریکی شہریوں کے لیے پاسپورٹ تجدید کی اہم سہولت متعارف

بیرون ملک مقیم امریکی شہریوں کے لیے پاسپورٹ کی تجدید کے حوالے سے اہم سہولت متعارف کرانے کی تیاری کی جارہی ہے۔ امریکی محکمہ خارجہ نے بیرون ملک مقیم اہل شہریوں کو مکمل طور پر آن لائن پاسپورٹ کی تجدید کی اجازت دینے کی تجویز پیش کردی ہے۔

مجوزہ اقدام پر عمل درآمد کی صورت میں بیرون ملک رہنے والے ایسے امریکی شہری جنہیں آن لائن تجدید کے لیے اہل قرار دیا جائے گا انہیں پاسپورٹ کی تجدید کے لیے سفارتخانے یا قونصل خانے کے دورے کی ضرورت نہیں رہے گی۔

امریکی محکمہ خارجہ کے مطابق اس حوالے سے مجوزہ قاعدہ جمعہ کو فیڈرل رجسٹر میں شائع کیا گیا ہے۔ اس قاعدے کے تحت محکمہ خارجہ کے موجودہ آن لائن پاسپورٹ تجدید کے نظام کو بیرون ملک مقیم اہل درخواست دہندگان تک توسیع دینے کی تجویز دی گئی ہے۔

 یہ بھی پڑھیں :اسلام آباد: امریکی سفارتخانے کا جعلی کارڈ رکھنے والا افغان شہری گرفتار

نئی سہولت کا مقصد بیرون ملک مقیم امریکی شہریوں کے لیے پاسپورٹ کی تجدید کے عمل کو مزید آسان بنانا ہے۔ موجودہ طریقہ کار میں بعض درخواست دہندگان کو دستاویزات اور دیگر مراحل کی تکمیل کے لیے سفارتی مشن سے رابطہ کرنا پڑتا ہے تاہم مجوزہ نظام کے تحت اہل شہری آن لائن طریقے سے درخواست مکمل کرسکیں گے۔

محکمہ خارجہ کے مطابق بیرون ملک اس پروگرام کا نفاذ مرحلہ وار کیا جائے گا۔ اس کا مطلب ہے کہ تمام ممالک میں یہ سہولت ایک ہی وقت میں دستیاب نہیں ہوگی بلکہ مختلف مراحل میں اس کا دائرہ وسیع کیا جائے گا۔

محکمہ خارجہ عمل درآمد میں پیش رفت کے ساتھ اپنی سفری ویب سائٹ پر ان ممالک کی فہرست بھی برقرار رکھے گا جہاں آن لائن پاسپورٹ تجدید کی سہولت دستیاب ہوگی۔

یہ سہولت خاص طور پر ان امریکی شہریوں کے لیے اہم قرار دی جارہی ہے جو مستقل یا عارضی طور پر امریکا سے باہر مقیم ہیں اور پاسپورٹ کی تجدید کے لیے سفارتخانے یا قونصل خانے جانے کی دشواری سے بچنا چاہتے ہیں۔

 یہ بھی پڑھیں :حکومت پاکستان کا غیر ملکی شہریوں کے خلاف کریک ڈاؤن تیز کرنے کا فیصلہ

مجوزہ نظام کے تحت آن لائن تجدید کی سہولت صرف ان درخواست دہندگان کو حاصل ہوگی جو محکمہ خارجہ کی جانب سے مقرر کردہ اہلیت کے معیار پر پورا اتریں گے۔ ہر بیرون ملک مقیم امریکی شہری کے لیے خودکار طور پر آن لائن تجدید کی سہولت دستیاب نہیں ہوگی۔

امریکی محکمہ خارجہ کی جانب سے یہ تجویز پاسپورٹ خدمات کو مزید جدید اور آسان بنانے کی کوششوں کا حصہ ہے۔ آن لائن نظام کے ذریعے درخواستوں کی وصولی سے بیرون ملک مقیم شہریوں کے لیے پاسپورٹ تجدید کے عمل میں وقت اور سفری مشکلات کم ہونے کی توقع ہے۔

پروگرام کے مرحلہ وار نفاذ کے بعد بیرون ملک مقیم امریکی شہری اپنی رہائش کے ملک میں یہ سہولت دستیاب ہونے کی صورت میں محکمہ خارجہ کی متعلقہ ویب سائٹ کے ذریعے اہلیت اور درخواست کے طریقہ کار سے متعلق معلومات حاصل کرسکیں گے۔

یوں مجوزہ تبدیلی کے نتیجے میں بیرون ملک مقیم اہل امریکی شہریوں کے لیے پاسپورٹ کی تجدید کا عمل پہلے کے مقابلے میں زیادہ آسان اور سہل ہونے کی راہ ہموار ہوگئی ہے۔