وزیراعلیٰ پنجاب مریم نواز سے ایشین ڈیولپمنٹ بینک (اے ڈی بی) کے نائب صدر ینگ منگ یانگ نے ملاقات کی، جس میں پنجاب میں صاف پانی، زراعت، صحت، تعلیم، فنی تربیت اور پبلک ٹرانسپورٹ سمیت مختلف شعبوں میں تعاون بڑھانے پر تبادلہ خیال کیا گیا۔
ملاقات کے دوران ایشین ڈیولپمنٹ بینک کے نائب صدر نے وزیراعلیٰ پنجاب کے عوامی خدمت کے وژن اور منصوبوں کی تیز رفتار تکمیل کو سراہا۔ دونوں جانب سے صوبے میں جاری ترقیاتی منصوبوں میں تعاون مزید بڑھانے اور عوام کو بنیادی سہولیات کی فراہمی کے لیے مشترکہ اقدامات پر اتفاق کیا گیا۔
ملاقات کے دوران وزیراعلیٰ مریم نواز نے پنجاب کے عوام کے لیے اہم اعلان کرتے ہوئے کہا کہ اگلے سال تک اے ڈی بی کی معاونت سے مزید 2 ہزار الیکٹرک بسیں سڑکوں پر چلائی جائیں گی۔
انہوں نے کہا کہ پنجاب حکومت شہریوں کو جدید، آرام دہ اور ماحول دوست سفری سہولیات فراہم کرنے کے لیے پبلک ٹرانسپورٹ کے نظام کو وسعت دے رہی ہے۔ الیکٹرک بسوں کا منصوبہ شہریوں کو بہتر سفری سہولت دینے کے ساتھ ساتھ ماحولیاتی آلودگی میں کمی کے لیے بھی اہم قرار دیا جا رہا ہے۔
ملاقات میں صحت کے شعبے کو خصوصی اہمیت دی گئی۔ وزیراعلیٰ نے کہا کہ ہیلتھ پراجیکٹس پنجاب حکومت کی ترجیحات میں شامل ہیں اور عوام کو معیاری طبی سہولیات کی فراہمی کے لیے منصوبوں کو تیزی سے مکمل کیا جا رہا ہے۔
مریم نواز نے کارڈیک اسپتال، چلڈرن اسپتال اور کینسر اسپتال جیسے اہم منصوبوں میں ایشین ڈویلپمنٹ بینک کی معاونت کی ضرورت پر زور دیا۔
انہوں نے کہا کہ صحت کے شعبے میں جدید سہولیات کی فراہمی حکومت کی ترجیحات میں شامل ہے اور ان منصوبوں کی تکمیل سے عوام کو علاج معالجے کی بہتر سہولیات اپنے صوبے میں میسر آئیں گی۔
ملاقات میں نرسنگ ایجوکیشن اور اسٹیم لیبز کے فروغ کے حوالے سے بھی تفصیلی گفتگو ہوئی۔
فنی اور تکنیکی تعلیم کو جدید تقاضوں سے ہم آہنگ کرنے کے لیے تعاون بڑھانے پر تبادلہ خیال کیا گیا، جبکہ نوجوانوں کو مارکیٹ کی ضروریات کے مطابق ہنر فراہم کرنے اور روزگار کے بہتر مواقع پیدا کرنے کے لیے مختلف اقدامات پر بھی بات ہوئی۔
دونوں جانب سے انسانی وسائل کی ترقی، تعلیم اور فنی تربیت کے شعبوں میں تعاون کو مزید وسعت دینے کی اہمیت پر اتفاق کیا گیا۔
ملاقات کے دوران کسانوں کے لیے رعایتی قرضوں کے معاہدوں پر بھی بات چیت کی گئی۔
زرعی شعبے میں کسانوں کو مالی سہولت فراہم کرنے، زرعی پیداوار بڑھانے اور جدید طریقہ ہائے کاشت کو فروغ دینے کے لیے فنانسنگ کے مواقع بہتر بنانے پر توجہ دی گئی۔
وزیراعلیٰ مریم نواز نے کہا کہ زرعی شعبے کی ترقی پنجاب کی معیشت کے لیے بنیادی اہمیت رکھتی ہے اور حکومت کسانوں کو جدید سہولیات، بہتر فنانسنگ اور مارکیٹ تک رسائی فراہم کرنے کے لیے اقدامات کر رہی ہے۔
مریم نواز نے پنجاب اکنامک ٹرانسفارمیشن پلان کو زراعت کے لیے گیم چینجر قرار دیتے ہوئے کہا کہ اس منصوبے کے تحت زرعی شعبے میں بنیادی تبدیلیاں لانے پر توجہ دی جا رہی ہے۔
انہوں نے کہا کہ حکومت تیل دار اجناس، دالوں اور پھلوں کی کاشت میں اضافے کے ساتھ ساتھ زرعی فنانس اور کولڈ چین کے نظام کو بہتر بنانے کے لیے اقدامات کر رہی ہے۔
ان کا کہنا تھا کہ زرعی پیداوار میں اضافے کے ساتھ فصلوں کے بعد ہونے والے نقصانات کو کم کرنا بھی ضروری ہے، جس کے لیے کولڈ اسٹوریج اور کولڈ چین انفرااسٹرکچر کو بہتر بنایا جائے گا۔
ملاقات میں پینے کے صاف پانی کی فراہمی، زراعت، تکنیکی ہنر، صحت اور تعلیم سمیت مختلف شعبوں میں ایشین ڈویلپمنٹ بینک کے تعاون کو مزید بڑھانے پر اتفاق کیا گیا۔
دونوں جانب سے اس بات پر زور دیا گیا کہ ترقیاتی منصوبوں کا مقصد عام شہریوں کو بنیادی سہولیات کی بہتر فراہمی اور صوبے میں پائیدار معاشی و سماجی ترقی کو یقینی بنانا ہونا چاہیے۔
وزیراعلیٰ پنجاب نے کہا کہ پنجاب حکومت ایشین ڈویلپمنٹ بینک کے ساتھ پاکستان کی مضبوط اور طویل مدتی شراکت داری کو مزید مستحکم کرنا چاہتی ہے۔
انہوں نے کہا کہ پنجاب میں مختلف ترقیاتی منصوبوں پر تیزی سے کام جاری ہے اور حکومت عوامی فلاح کے منصوبوں کی بروقت تکمیل کو یقینی بنانے کے لیے پرعزم ہے۔
مریم نواز کے مطابق صوبے میں جاری منصوبے تیزی سے تکمیل کی جانب بڑھ رہے ہیں، جبکہ صحت، تعلیم، زراعت اور شہری سہولیات سے متعلق منصوبوں کو خصوصی ترجیح دی جا رہی ہے۔
ملاقات میں پنجاب میں ترقیاتی منصوبوں، معاشی اصلاحات اور عوامی سہولیات کے لیے مستقبل میں ایشین ڈویلپمنٹ بینک کے تعاون کے امکانات کا بھی جائزہ لیا گیا، جبکہ مختلف شعبوں میں شراکت داری کو عملی شکل دینے کے لیے مزید اقدامات پر اتفاق کیا گیا۔
