موبائل فون رجسٹر کرانا اب آسان؟ ایف بی آر نے نیا طریقہ متعارف کرا دیا

موبائل فون صارفین کے لیے اہم خبر، ایف بی آر نے درآمدی موبائل فونز کی رجسٹریشن کے لیے سیلز ٹیکس ماہانہ اقساط میں ادا کرنے کی سہولت متعارف کرا دی۔

فیڈرل بورڈ آف ریونیو (ایف بی آر) نے ڈیوائس آئیڈینٹیفکیشن رجسٹریشن اینڈ بلاکنگ سسٹم کے تحت درآمدی موبائل فونز کی رجسٹریشن کے لیے اہل افراد کو ٹیکس قسطوں میں ادا کرنے کی اجازت دے دی ہے۔

اس حوالے سے کسٹمز جنرل آرڈر نمبر 06 آف 2026 کے ذریعے 2019 کے سابقہ حکم نامے میں ترمیم کی گئی ہے۔ نئے فیصلے کے تحت متعلقہ شرائط پر پورا اترنے والے افراد موبائل فون رجسٹر کراتے وقت ماہانہ اقساط میں سیلز ٹیکس ادا کرنے کا انتخاب کر سکتے ہیں۔

ایف بی آر کے مطابق ٹیکس کی رقم مالی سال کے باقی مہینوں میں برابر اقساط کی صورت میں تقسیم کی جائے گی۔ درخواست جمع کرانے والا مہینہ بھی ان مہینوں میں شامل ہوگا۔

یہ بھی پڑھیں:136 سال پرانی پینٹنگ کا معمہ حل؟ سائنس دانوں نے آسمان کا سراغ لگا لیا

تاہم، جون میں درآمدی موبائل فون رجسٹر کرانے والے افراد کو پورا سیلز ٹیکس اسی ماہ کے اختتام تک ادا کرنا ہوگا، کیونکہ مالی سال 30 جون کو ختم ہو جاتا ہے۔

قسطوں کی ادائیگی کا طریقہ کیا ہوگا؟

درخواست جمع کراتے وقت پہلی قسط کے لیے پیمنٹ سلپ آئی ڈی (PSID) جاری کی جائے گی۔ اس کے بعد ہر ماہ مقررہ تاریخ پر اگلی قسط کی ادائیگی کے لیے الگ پیمنٹ سلپ آئی ڈی بنائی جائے گی۔

یہ بھی پڑھیں:گوگل کروم میں بڑا سیکیورٹی فیچر متعارف، خطرناک ویب سائٹس کھولنے سے پہلے وارننگ

اگر کسی مہینے میں مقررہ تاریخ موجود نہ ہو تو پیمنٹ سلپ آئی ڈی اس مہینے کے آخری دن کے لیے جاری کی جائے گی۔ تمام اقساط کی ادائیگی 30 جون تک مکمل کرنا لازمی ہوگا۔ صارفین چاہیں تو باقی ماندہ ٹیکس کی کچھ یا پوری رقم مقررہ وقت سے پہلے بھی ادا کر سکتے ہیں۔

ایف بی آر نے خبردار کیا ہے کہ اگر کوئی شخص مقررہ تاریخ تک قسط ادا نہیں کرتا تو اسے نادہندہ قرار دیا جا سکتا ہے۔ یہ سہولت درآمدی موبائل فونز کی رجسٹریشن کے لیے اہل افراد کو ٹیکس کی ادائیگی میں آسانی فراہم کر سکتی ہے۔ تاہم، درخواست دینے سے پہلے متعلقہ شرائط اور اپنی اہلیت کی تصدیق کرنا ضروری ہے۔