رونالڈو کی دولت نئی بلندیوں پر، لیونل میسی بھی پیچھے رہ گئے

پرتگال کے عالمی شہرت یافتہ فٹبالر کرسٹیانو رونالڈو نے میدان میں کامیابیوں کے ساتھ دولت کے معاملے میں بھی نیا ریکارڈ قائم کر دیا۔ امریکی جریدے فوربز کے مطابق رونالڈو فٹبال کی تاریخ کے پہلے کھلاڑی بن گئے ہیں جن کی دولت ملٹی بلینیئر کی سطح تک پہنچ گئی ہے۔

میڈیا رپورٹ کے مطابق 41 سالہ رونالڈو نے گزشتہ ایک سال کے دوران تقریباً 22 کروڑ 50 لاکھ پاؤنڈ کمائے۔ ان کی آمدنی کا بڑا حصہ سعودی فٹبال کلب النصر سے ملنے والے معاوضے پر مشتمل ہے، جبکہ اشتہارات اور کاروباری سرگرمیوں سے بھی انہیں بھاری رقم حاصل ہوتی ہے۔

میڈیا رپورٹ میں بتایا گیا ہے کہ النصر کی جانب سے رونالڈو کو روزانہ تقریباً 4 لاکھ 88 ہزار پاؤنڈ معاوضہ ملتا ہے۔ اس کے علاوہ انہوں نے اشتہارات اور مختلف کاروباری سرگرمیوں کے ذریعے تقریباً 4 کروڑ 20 لاکھ پاؤنڈ بھی کمائے۔

یہ بھی پڑھیں:کرکٹ کے ایوانوں میں ہنگامہ،پاکستان کا بھارت میں شیڈول ورلڈ کپ میں شرکت سے متعلق بڑا فیصلہ سامنے آ گیا

امیر ترین فٹبالرز میں میسی دوسرے نمبر پر

فوربز کی فہرست میں ارجنٹائن کے اسٹار فٹبالر لیونل میسی دوسرے نمبر پر ہیں، جن کی گزشتہ ایک سال کی آمدنی تقریباً 10 کروڑ 90 لاکھ پاؤنڈ بتائی گئی ہے۔

فرانس کے معروف فٹبالر کائیلیان ایمباپے تقریباً 7 کروڑ 50 لاکھ پاؤنڈ کی آمدنی کے ساتھ تیسرے نمبر پر ہیں۔ مانچسٹر سٹی کے ایرلنگ ہالینڈ چوتھے جبکہ ریال میڈرڈ کے وینیسیئس جونیئر پانچویں نمبر پر رہے۔ اسپین کے نوجوان فٹبالر لامین یامال نے فہرست میں چھٹی پوزیشن حاصل کی۔

رونالڈو اور میسی کی مالی برتری برقرار

میڈیا رپورٹ کے مطابق رونالڈو اور میسی گزشتہ 13 برسوں کے دوران 12 مرتبہ اس فہرست میں پہلے دو مقامات پر جگہ بنا چکے ہیں۔ یہ دونوں کھلاڑیوں کی طویل عرصے سے جاری کھیلوں کی کامیابیوں، عالمی شہرت اور تجارتی مقبولیت کو ظاہر کرتا ہے۔

رونالڈو کی یہ کامیابی اس بات کی مثال ہے کہ جدید فٹبال میں کھلاڑیوں کی آمدنی صرف کھیل تک محدود نہیں رہی، بلکہ اشتہارات، برانڈز اور کاروباری سرگرمیاں بھی ان کی دولت میں اہم کردار ادا کرتی ہیں۔