بلوچستان میں خاران کے علاقہ لجے اور کچی کے علاقہ سنی میں سیکیورٹی فورسز کی موثر کاروائیاں 17 دہشتگرد جہنم واصل

بلوچستان کے اضلاع کچھی اور خاران میں سیکیورٹی فورسز نے دو مختلف کارروائیوں کے دوران فتنہ الہندوستان سے تعلق رکھنے والے 17 دہشت گردوں کو ہلاک کردیا، جبکہ خاران میں دہشت گردوں کے خلاف آپریشن کے دوران پاک فوج کا ایک جوان بہادری سے لڑتے ہوئے شہید ہوگیا۔

سیکیورٹی ذرائع کے مطابق ضلع کچھی کے علاقے سنی میں سیکیورٹی فورسز نے مؤثر کارروائی کرتے ہوئے فتنہ الہندوستان کے 10 دہشت گردوں کو ہلاک کردیا۔ کارروائی کے دوران دہشت گردوں کے خلاف بھرپور جوابی کارروائی کی گئی اور انہیں انجام تک پہنچایا گیا۔

اسی طرح ضلع خاران کے علاقے لجے میں بھی سیکیورٹی فورسز نے انٹیلی جنس معلومات کی بنیاد پر کارروائی کی، جس کے دوران فتنہ الہندوستان کے مزید 7 دہشت گرد ہلاک ہوگئے۔ اس کارروائی میں سپاہی حکمت اللہ نے دہشت گردوں کا مقابلہ کرتے ہوئے بہادری کی مثال قائم کی اور جامِ شہادت نوش کیا۔

شہید سپاہی حکمت اللہ کی نمازِ جنازہ کوئٹہ میں ادا

شہید سپاہی حکمت اللہ کی نمازِ جنازہ کوئٹہ میں ادا کی گئی، جس میں آئی جی ایف سی بلوچستان (نارتھ) میجر جنرل محمد عاطف مجتبیٰ سمیت اعلیٰ سول و عسکری حکام نے شرکت کی۔

نمازِ جنازہ کے موقع پر شرکاء نے شہید کی بہادری اور وطن کے دفاع کے لیے دی جانے والی قربانی کو خراجِ عقیدت پیش کیا۔ نمازِ جنازہ کی ادائیگی کے بعد شہید کا جسدِ خاکی ان کے آبائی علاقے روانہ کردیا گیا، جہاں انہیں مکمل فوجی اعزاز کے ساتھ سپردِ خاک کیا جائے گا۔

سیکیورٹی فورسز کی ان کارروائیوں میں مجموعی طور پر 17 دہشت گردوں کی ہلاکت اور ایک جوان کی شہادت بلوچستان میں امن و امان کے قیام کے لیے جاری کوششوں کے دوران پیش آنے والا اہم واقعہ ہے۔