ایپکس کمیٹی اجلاس میں اہم فیصلے، دہشتگرد تنظیموں کیخلاف فوجی آپریشن کی بھی منظوری

وزیراعظم محمد شہباز شریف کی زیر صدارت وفاقی ایپکس کمیٹی کا اجلاس ہوا جس میں وفاقی کابینہ، صوبائی وزرائے اعلیٰ، جنرل سید عاصم منیر، آرمی چیف اور سینئر سرکاری حکام نے شرکت کی۔

اجلاس کا ایجنڈا ”پاکستان کی انسداد دہشت گردی (سی ٹی) مہم کی بحالی“ پر مرکوز تھا۔ شرکاء کو بدلتے ہوئے سیکیورٹی منظرنامے اور امن و امان کی عمومی صورتحال، ذیلی قوم پرستی کو ہوا دینے کی کوششوں کے خلاف اقدامات، مذہبی انتہا پسندی، غیر قانونی اسپیکٹرم اور جرائم و دہشت گردی کے گٹھ جوڑ سے نمٹنے، تخریب کاری اور غلط معلومات پھیلانے کی مہم سمیت دیگر اہم چیلنجز سے نمٹنے کے لیے اٹھائے جانے والے اقدامات کے بارے میں آگاہ کیا گیا۔

کمیٹی نے ان کثیر الجہتی چیلنجوں سے موثر انداز میں نمٹنے کے لئے ایک متحد سیاسی آواز اور ایک مربوط قومی بیانیے کی ضرورت پر روشنی ڈالی۔ اجلاس میں اس بات پر زور دیا گیا کہ وژن عظمت استحکام کے فریم ورک کے تحت قومی سی ٹی مہم کو ازسرنو متحرک کرنے کے لئے تمام جماعتوں سے بالاتر سیاسی حمایت اور مکمل قومی اتفاق رائے انتہائی اہمیت کا حامل ہے۔

نیکٹا کی بحالی اور قومی و صوبائی انٹیلی جنس فیوژن اینڈ تھریٹ اسسمنٹ سینٹر کے قیام پر بھی اتفاق کیا گیا۔ ان مسائل کو جامع طور پر حل کرنے کے لئے سفارتی، سیاسی، معلوماتی، انٹیلی جنس، سماجی و اقتصادی اور فوجی کوششوں کو شامل کرتے ہوئے ایک پورے نظام کا نقطہ نظر اپنایا گیا تھا۔

اجلاس میں وفاقی اور صوبائی حکومتوں اور متعلقہ اداروں اور وزارتوں کے درمیان تعاون کو مضبوط بنانے پر خصوصی زور دیا گیا تاکہ سی ٹی مہم پر بلاتعطل عملدرآمد کو یقینی بنایا جاسکے۔ اجلاس میں فیصلہ کیا گیا کہ صوبائی ایپکس کمیٹیوں کے تحت ڈسٹرکٹ کوآرڈینیشن کمیٹیاں قائم کی جائیں گی تاکہ وفاقی اور صوبائی حکومتوں کی جانب سے موصول ہونے والی ہدایات پر عملدرآمد کو یقینی بنایا جاسکے۔

فورم نے غیر قانونی اسپیکٹرم اور جرائم اور دہشت گردی کے گٹھ جوڑ کے ماحولیاتی نظام کو ختم کرنے کے لئے سیاسی عزم کا مظاہرہ کیا۔ شرکاء نے بلوچستان میں سرگرم دہشت گرد تنظیموں بشمول مجید بریگیڈ، بی ایل اے، بی ایل ایف اور براس کے خلاف جامع فوجی آپریشن کی بھی منظوری دی جو دشمن بیرونی طاقتوں کے اشارے پر عدم تحفظ پیدا کرکے پاکستان کی معاشی ترقی کو روکنے کے لئے معصوم شہریوں اور غیر ملکی شہریوں کو نشانہ بنا رہے ہیں۔

آرمی چیف نے قومی سلامتی کو درپیش تمام خطرات کے خاتمے اور امن و استحکام کو یقینی بنانے کے حکومتی اقدامات کی بھرپور حمایت کے لیے پاک فوج کے غیر متزلزل عزم کا اعادہ کیا۔اختتام پر وزیراعظم نے تمام اسٹیک ہولڈرز کو ہدایت کی کہ وہ مجوزہ اقدامات پر بھرپور انداز میں عمل کریں اور ان پر بروقت عملدرآمد کو یقینی بنائیں۔

انہوں نے پاکستان کی خودمختاری کے تحفظ، اپنے شہریوں کے تحفظ کو یقینی بنانے اور معاشی اور سماجی استحکام کو مستحکم کرنے کے لئے مستقل اور مربوط کوششوں کی اہمیت پر زور دیا۔