پاک افغان تعلقات میں بہتری کے لیےکردار ادا کرنے کوتیار ہیں، چین

پاکستان اور افغانستان کے درمیان جاری کشیدگی کے تناظر میں چین کی جانب سے باضابطہ ردعمل سامنے آیا ہے جس میں بیجنگ نے دونوں پڑوسی ممالک پر زور دیا ہے کہ وہ تنازعات کو بات چیت اور سفارتی رابطوں کے ذریعے حل کریں۔

چین کی وزارتِ خارجہ کے ترجمان گو جیاکن نے پاک افغان تعلقات پر معمول کی ایک پریس کانفرنس میں اظہارِ خیال کیا،ترجمان کا کہنا تھا کہ پاکستان اور افغانستان دونوں چین کے روایتی اور قریبی دوست‘ ہیں اس لیے بیجنگ خطے میں امن و استحکام کے لیے ہمیشہ مثبت کردار ادا کرنے کی خواہش رکھتا ہے۔

ان کے مطابق چین یہ امید کرتا ہے کہ دونوں ممالک کشیدگی میں کمی لانے کے لیے سنجیدہ اقدامات کریں گے اور ایسے اقدامات سے گریز کریں گے جو خطے میں مزید بے چینی پیدا کریں۔

یہ بھی پڑھیں :چین کا پاک افغان تعلقات بہتر بنانے میں تعمیری کردار ادا کرنے کا اعلان

گو جیاکن نے مزید کہا کہ چین اس اصول پر قائم ہے کہ تنازعات کا بہترین حل بات چیت، سفارت کاری اور باہمی اعتماد کے فروغ میں ہے۔
انہوں نے زور دیا کہ پاکستان اور افغانستان کو مشترکہ چیلنجز جیسے سرحدی مسائل، سکیورٹی معاملات اور علاقائی تعاون سے نمٹنے کے لیے مل بیٹھ کر حکمت عملی تیار کرنی چاہیے، کیونکہ کسی بھی قسم کی محاذ آرائی پورے خطے کے استحکام پر اثر انداز ہو سکتی ہے۔

ترجمان نے واضح کیا کہ چین نہ صرف خطے کے امن میں دلچسپی رکھتا ہے، بلکہ وہ بین الاقوامی برادری کے ساتھ مل کر پاک-افغان تعلقات کو بہتر بنانے کے لیے بھی کردار ادا کرنے کو تیار ہے۔ ان کے مطابق چین کی خواہش ہے کہ افغانستان اور پاکستان ایک پائیدار اور اعتماد پر مبنی سفارتی راستہ اختیار کریں، جو دونوں ممالک کے عوام کے بہتر مستقبل کا ضامن بنے۔