اڈیالہ جیل میں سحر و افطار کے شاہانہ پکوان،مینیو میں کیا کچھ ؟جانیے

رمضان المبارک کی آمد کے ساتھ ہی اڈیالہ جیل میں سحر و افطار کے لیے خصوصی انتظامات مکمل کر لیے گئے ہیں تاکہ قیدی عبادات اور روزہ آسانی سے ادا کر سکیں اور روحانی ماحول قائم رہے۔

ذرائع کے مطابق، سحری کے وقت قیدیوں کو متوازن اور معیاری خوراک فراہم کی جائے گی تاکہ وہ دن بھر توانائی برقرار رکھ سکیں۔ سحری میں روٹی اور پراٹھے کے ساتھ انڈا، چکن، دال اور سبزی شامل ہوں گے جبکہ چائے کا بھی باقاعدہ اہتمام کیا گیا ہے تاکہ قیدی سحری مکمل سہولت کے ساتھ کر سکیں۔

یہ بھی پڑھیں:عمران خان کے ذاتی معالجین سے چیک اپ سے متعلق اہم پیش رفت

افطار کے وقت قیدیوں کو سنت کے مطابق کھجور فراہم کی جائے گی، ساتھ ہی دودھ ملا شربت بھی دیا جائے گا تاکہ فوری توانائی بحال ہو سکے۔ اس کے علاوہ افطار میں سموسے، چکن اور دال چاول بھی شامل ہوں گے۔ ہفتے میں تین دن گوشت کی خصوصی فراہمی ہوگی تاکہ خوراک میں تنوع برقرار رہے۔ جیل مینول کے مطابق یہ اشیاء ہفتے کے متبادل دنوں میں فراہم کی جائیں گی۔

حکام کا کہنا ہے کہ رمضان المبارک کا اصل مقصد اصلاح، صبر اور عبادت ہے، اس لیے جیلوں میں بھی ایسا ماحول فراہم کیا جاتا ہے جہاں قیدی مذہبی فرائض بہتر انداز میں ادا کر سکیں۔ انتظامیہ نے بتایا کہ تمام انتظامات باقاعدہ نگرانی کے تحت کیے جا رہے ہیں تاکہ رمضان کے بابرکت مہینے میں قیدیوں کو تمام بنیادی سہولیات میسر ہوں اور کسی قسم کی کوتاہی نہ ہو۔