عمران خان کا دوسرا طبی پروسیجر مکمل، اگلا انجیکشن 24 مارچ کو لگایا جائے گا، طارق فضل چوہدری

وفاقی وزیر طارق فضل چوہدری نے بانی پی ٹی آئی عمران خان  کی آنکھ کے دوسرے طبی پروسیجر سے متعلق وضاحت جاری کر دی۔

تفصیلات کے مطابق سماجی رابطے کی ویب سائٹ ایکس پرعمران خان  کی آنکھ کے دوسرے  پروسیجر سے متعلق وضاحت جاری کرتے انہوں نے کہا کہ حکومت نے تمام قانونی اور انسانی تقاضے پورے کرتے ہوئے بانی پی ٹی آئی کو سخت سکیورٹی انتظامات میں پاکستان انسٹیٹیوٹ آف میڈیکل سائنسز منتقل کیا، پہلے پروسیجر کے بعد بینائی میں بہتری آئی تھی جس کے بعد ماہر معالجین نے دوسرے پروسیجر کی سفارش کی۔

طارق فضل چوہدری نے کہا کہ  آج دوسرا طبی عمل کامیابی سے مکمل کیا گیا اور میڈیکل ٹیم کی کلیئرنس کے بعد انہیں دوبارہ اڈیالہ جیل منتقل کر دیا گیا ہے۔

طارق فضل چوہدری نے مزید بتایا کہ بانی پی ٹی آئی کو تیسرا انجیکشن 24 مارچ کو لگایا جائے گا، ہر قیدی کو قانون کے مطابق طبی سہولیات کی فراہمی ریاست کی ذمہ داری ہے اور اس معاملے میں بھی تمام انتظامات شفاف اور ضابطے کے مطابق کیے گئے ہیں۔

عمران خان کی آنکھ کے دوسرے طبی پروسیجر کے حوالے سے وضاحت کرنا ضروری ہے کہ حکومت نے تمام قانونی اور انسانی تقاضے پورے کرتے ہوئے انہیں سخت سیکیورٹی انتظامات میں پمز منتقل کیا۔

ڈاکٹرز کی ہدایات کے مطابق پہلے پروسیجر کے بعد بینائی میں بہتری آئی، جس کے پیشِ نظر ماہر معالجین نے دوسرے…

— Dr. Tariq Fazal Ch. (@DrTariqFazal) February 24, 2026

قبل ازیں اسلام آباد میں واقع پاکستان انسٹی ٹیوٹ آف میڈیکل سائنسز(پمز) نے پاکستان تحریک انصاف (پی ٹی آئی ) کے بانی چیئرمین عمران خان کے فالو اَپ چیک کے بعد ان کی صحت سے متعلق اعلامیہ جاری کیا تھا۔

اعلامیے کے مطابق عمران خان کی ای سی جی اور ایکو کارڈیو گرافی بالکل نارمل پائی گئی ہے اور وہ طبی طور پر مستحکم اور بالکل تندرست ہیں،  اسپتال انتظامیہ کا کہنا ہے کہ اینٹی وی ای جی ایف انٹراوٹریئل انجکشن کی دوسری خوراک بھی انہیں دے دی گئی ہے، جو آنکھوں کے مخصوص علاج کے لیے استعمال ہوتا ہے۔

یہ بھی پڑھیں : چار ماہ کی غفلت والی کوئی بات نہیں، خان صاحب کی صحت پر سیاست نہ کریں : رانا ثنا اللہ

میڈیا رپورٹ کے مطابق اعلامیے میں بتایا گیا ہے کہ ’طریقہ کار سے قبل تشکیل دیے گئے میڈیکل بورڈ نے ان کا مکمل معائنہ کیا‘۔ بورڈ میں پمز کے علاوہ الشفا آئی اسپتال کے ماہرڈاکٹرز بھی شامل تھے، جنہوں نے مشترکہ طور پر طبی رپورٹس کا جائزہ لیا۔

 واضح رہے کہ اس دوران سیکیورٹی کے سخت انتظامات کے تحت انہیں اسپتال لایا اور واپس منتقل کیا گیا۔