ناروے کے شاہ ہارالڈ پنجم 89 برس کی عمر میں انتقال کر گئے۔ ان کی وفات ایک ایسے وقت میں ہوئی ہے جب ناروے کا شاہی خاندان مختلف داخلی تنازعات اور عوامی دباؤ کا سامنا کر رہا ہے۔
یورپ کے معمر ترین بادشاہوں میں شمار ہونے والے شاہ ہارالڈ کو 17 اگست کو طبیعت خراب ہونے کے بعد اسپتال منتقل کیا گیا تھا، جہاں ان کے خون میں بیکٹیریل انفیکشن کا علاج جاری تھا۔
شاہ ہارالڈ گزشتہ چند برسوں سے صحت کے مختلف مسائل کا بھی سامنا کر رہے تھے۔ 2024 میں ملائیشیا میں تعطیلات کے دوران طبیعت خراب ہونے پر انہیں عارضی پیس میکر لگایا گیا تھا، جسے بعد ازاں ناروے واپسی پر مستقل پیس میکر سے تبدیل کردیا گیا۔
شاہ ہارالڈ کی وفات ایک ایسے وقت میں ہوئی ہے جب شاہی خاندان پہلے ہی مختلف تنازعات کی زد میں ہے۔ ولی عہد شہزادہ ہاکون کی اہلیہ کراؤن پرنسس میٹ مارٹ کو امریکی مجرم جیفری ایپسٹین کے ساتھ ماضی کے تعلقات کے معاملے پر عوامی تنقید کا سامنا رہا ہے، جس پر وہ معذرت بھی کر چکی ہیں۔
شاہ ہارالڈ پنجم 1991 میں اپنے والد شاہ اولاف پنجم کے انتقال کے بعد ناروے کے بادشاہ بنے تھے۔ اپنے دور حکومت میں انہوں نے شاہی خاندان کو جدید دور کے تقاضوں سے ہم آہنگ کرنے کی کوشش کی۔
شاہ ہارالڈ کے انتقال کے بعد ان کے بیٹے، 53 سالہ ولی عہد شہزادہ ہاکون، ناروے کے نئے بادشاہ ہوں گے۔ وہ 1905 میں سویڈن سے آزادی کے بعد ناروے کے چوتھے بادشاہ ہوں گے، جبکہ ان کی اہلیہ میٹ مارٹ ملکہ کا درجہ حاصل کریں گی۔
شاہ ہارالڈ کی وفات کے ساتھ ناروے کے شاہی خاندان میں ایک نئے دور کا آغاز ہوگیا ہے، تاہم نئے بادشاہ کو اقتدار سنبھالتے ہی شاہی خاندان کو درپیش متعدد داخلی چیلنجز کا سامنا بھی کرنا ہوگا۔
By 
