آپریشن سوئفٹ ریٹارٹ کی ساتویں سالگرہ،اہلکاروں کی پیشہ ورانہ مہارت اور قربانیوں کو خراج تحسین پیش

پاکستان کے مسلح افواج نے آپریشن سوئفٹ ریٹارٹ کی ساتویں سالگرہ منائی، جس میں پاکستان آرمی کے فیلڈ مارشل سید عاصم منیر ، نیوی کے چیف ایڈمرل نوید اشرف اور ایئر چیف مارشل ظہیر احمد بابر سدھو نے اپنے اہلکاروں کی بہادری، پیشہ ورانہ مہارت اور قربانیوں کو خراج تحسین پیش کیا۔

آپریشن سوئفٹ ریٹارٹ، جو 27 فروری 2019 کو شروع کیا گیا تھا، بھارت کی بلا اشتعال جارحیت کے جواب میں کی جانے والی فیصلہ کن کارروائی تھی۔ اس آپریشن نے پاکستان کی خودمختاری کے تحفظ کے لیے مسلح افواج کی عزم و قابلیت کو واضح کیا اور مزید جارحیت کو مؤثر طور پر روک کر علاقائی اسٹریٹجک توازن بحال کیا۔

یہ بھی پڑھیں:پاکستانی فورسز کی کامیاب کارروائی، جنوبی سرحدی علاقے میں 20 طالبان ہلاک،درجنوں پوسٹیں تباہ

فیلڈ مارشل اور سروس چیفس نے ایک مرتبہ پھر پاکستان کی قومی سلامتی اور خطے میں امن قائم رکھنے کے لیے اپنی غیر متزلزل وابستگی کا اعادہ کیا اور کہا کہ مسلح افواج ہر طرح کے خطرات سے نمٹنے کے لیے ہر وقت تیار ہیں۔ انہوں نے اس بات پر زور دیا کہ پاکستان کی فوج ملکی تحفظ کے لیے چوکس ہے اور عالمی سطح پر امن و استحکام کے قیام میں بھی اپنا کردار ادا کر رہی ہے۔

آپریشن سوئفٹ ریٹارٹ نے پاکستان کی مسلح افواج کی عملی مہارت، تیز ردعمل اور تیار رہنے کی صلاحیت کو واضح کیا، جس سے دشمن کی مزید جارحیت کا مؤثر تدارک ممکن ہوا۔ اس موقع پر مسلح افواج نے اپنے اہلکاروں کی قربانیوں کو یاد کرتے ہوئے ان کے عزم اور پیشہ ورانہ مہارت کی تعریف کی۔