یو اے ای میں پاکستانیوں سے متعلق خبریں، وزارت داخلہ کا اہم بیان آگیا

وزارتِ داخلہ نے بعض میڈیا اور خصوصاً سوشل میڈیا پر گردش کرنے والی ان خبروں کا نوٹس لیا ہے جن میں دعویٰ کیا جا رہا تھا کہ متحدہ عرب امارات سے پاکستانی شہریوں کو کسی مخصوص بنیاد پر منظم انداز میں ڈی پورٹ کیا جا رہا ہے۔

وزارت کے مطابق متعلقہ تفصیلات اور دستیاب ڈیٹا کا جائزہ لینے کے بعد یہ واضح کیا گیا ہے کہ ایسی تمام رپورٹس بے بنیاد اور بدنیتی پر مبنی ہیں، جن کا مقصد غلط فہمی اور منفی تاثر پیدا کرنا ہے۔

وضاحت میں کہا گیا ہے کہ کسی بھی ملک کی جانب سے نہ تو کسی خاص قومیت اور نہ ہی کسی مخصوص طبقے کی بنیاد پر بے دخلی کی جا رہی ہے، جو بھی امارات یا دیگر ممالک سے واپسی کے واقعات ہوتے ہیں وہ وہاں کے قوانین، ویزا کی مدت ختم ہونے، قانونی تقاضوں کی خلاف ورزی یا دستاویزات کی کمی جیسے معمول کے انتظامی معاملات کے تحت ہوتے ہیں۔

یہ بھی پڑھیں :بیرون ممالک سے ڈی پورٹ کئے جانے والے شہریوں کے خلاف سخت کارروائی کرنے کا فیصلہ

وزارت نے مزید کہا کہ پاکستانی شہری بڑی تعداد میں قانونی تقاضے پورے کرتے ہوئے متحدہ عرب امارات اور دیگر دوست ممالک میں روزگار اور کاروباری ویزوں پر جا رہے ہیں اور کسی امتیاز کے بغیر ان مواقع سے فائدہ اٹھا رہے ہیں۔

بیان میں واضح کیا گیا کہ سوشل میڈیا پر پھیلائی جانے والی اس قسم کی غلط معلومات اور افواہیں گمراہ کن ہیں اور ان کا مقصد صرف منفی پروپیگنڈا کرنا ہے،مزید کہا گیا ہے کہ اگر کسی پاکستانی شہری کو کسی بھی ملک میں کوئی مسئلہ درپیش ہو تو اسے متعلقہ ملک کے ساتھ سفارتی اور سرکاری ذرائع کے ذریعے کیس ٹو کیس بنیاد پر حل کیا جاتا ہے۔