ٹرمپ کا درآمدی ڈرونز پر 100 فیصد ٹیرف عائد کرنے کا اعلان

  امریکی صدر ڈونلڈ ٹرمپ نے بیرونِ ملک سے امریکا درآمد کیے جانے والے ڈرونز اور ان کے بعض پرزہ جات پر 100 فیصد تک اضافی ٹیرف نافذ کرنے کا اعلان کردیا۔

وائٹ ہاؤس کے مطابق صدر ٹرمپ نے قومی سلامتی کو بنیاد بناتے ہوئے درآمدی بغیر پائلٹ فضائی نظام پر نئے محصولات عائد کرنے کا فیصلہ کیا ہے۔

 یہ بھی پڑھیں :ٹرمپ کا بڑا معاشی وار، پاکستان سمیت 60 ممالک پر نئے ٹیرف نافذ

بیان میں کہا گیا ہے کہ 25 کلوگرام سے زیادہ وزن رکھنے والے بعض ڈرون سسٹمز، بالخصوص تھرمل امیجنگ اور ڈاکنگ اسٹیشن جیسی جدید صلاحیتوں سے لیس آلات، کی درآمد پر 100 فیصد تک ٹیرف لاگو ہوگا۔

وائٹ ہاؤس کے مطابق چھوٹے ڈرونز کے لیے ٹیرف کی شرح 25 فیصد مقرر کی گئی ہے جبکہ نئے محصولات میں سے بیشتر کا نفاذ 3 ستمبر سے شروع ہوگا۔

امریکی حکومت کا کہنا ہے کہ ٹیرف عائد کرنے کا مقصد ملک کے اندر ڈرونز اور متعلقہ پرزہ جات کی تیاری کو فروغ دینا اور بیرونی سپلائی چینز پر انحصار کم کرنا ہے۔

 یہ بھی پڑھیں :ٹرمپ کا آبنائے ہرمز پر امریکی کنٹرول برقرار رکھنے کا اعلان، ایران کا بھی بڑا دعویٰ

پیش رفت ایسے وقت سامنے آئی ہے جب امریکا اور چین کے درمیان ڈرونز سمیت ٹیکنالوجی اور تجارت کے معاملات پر اختلافات برقرار ہیں۔ گزشتہ ہفتے چین نے بھی امریکا کو ڈرونز کی برآمدات محدود کرنے کے اقدامات کا اعلان کیا تھا۔

چین کی جانب سے امریکی تجارتی پابندیوں کے ردعمل میں 6 کمپنیوں کو بلیک لسٹ کیے جانے کے بعد یہ امریکی اقدام سامنے آیا ہے۔ واشنگٹن نے چین سمیت دیگر ممالک پر نئے ٹیرف عائد کرتے ہوئے اپنے تجارتی اور قومی سلامتی سے متعلق تحفظات کو فیصلوں کی بنیاد قرار دیا تھا۔