فیفا ورلڈکپ 2026 میں سینیگال نے شاندار کارکردگی کا مظاہرہ کرتے ہوئے عراق کو 0-5 سے شکست دے کر نئی تاریخ رقم کر دی۔ سینیگال نے نہ صرف گروپ میچ میں بڑی کامیابی حاصل کی بلکہ ورلڈکپ تاریخ میں ایک منفرد اعزاز بھی اپنے نام کر لیا۔
ٹورنٹو میں کھیلے گئے گروپ آئی کے میچ میں سینیگال نے آغاز ہی سے عراق پر دباؤ برقرار رکھا اور میچ کے چوتھے منٹ میں حبیب دیارا نے گول کر کے اپنی ٹیم کو برتری دلا دی۔ ابتدائی برتری کے بعد سینیگال نے جارحانہ کھیل کا سلسلہ جاری رکھا اور عراق کو واپسی کا کوئی موقع نہ دیا۔
سینیگال کی جانب سے پاپ گیے نے شاندار کھیل پیش کرتے ہوئے دو گول اسکور کیے جبکہ اسماعیلا سار اور ایلیمان ندیائے نے ایک، ایک گول کر کے ٹیم کی کامیابی کو یادگار بنا دیا۔
عراق کی ٹیم پورے میچ میں دباؤ کا شکار رہی اور سینیگال کے تیز رفتار حملوں کا مؤثر جواب نہ دے سکی۔ افریقی ٹیم نے دفاع، مڈفیلڈ اور اٹیک تینوں شعبوں میں بہتر کھیل پیش کرتے ہوئے ایک یکطرفہ فتح اپنے نام کی۔
اس کامیابی کے ساتھ سینیگال فیفا ورلڈکپ کی تاریخ میں ایک ہی میچ میں پانچ گول کرنے والی پہلی افریقی ٹیم بن گئی ہے۔ اس سے قبل کسی بھی افریقی ٹیم نے ورلڈکپ کے ایک میچ میں اتنے بڑے مارجن سے کامیابی حاصل نہیں کی تھی۔
عراق کے خلاف اس شاندار فتح کے بعد سینیگال کی ناک آؤٹ مرحلے تک رسائی کی امیدیں مزید مضبوط ہو گئی ہیں۔ ٹیم نے گروپ مرحلے میں اپنی پوزیشن بہتر بنانے کے لیے اہم کامیابی حاصل کر لی ہے، جبکہ آئندہ میچز میں بھی اس کی نظریں اگلے مرحلے میں جگہ بنانے پر ہوں گی۔
By 
