تعلیمی اداروں کے اوقات کارمیں اضافہ کردیا گیا

سندھ حکومت نے صوبے بھر کے سرکاری اور نجی تعلیمی اداروں میں تدریسی سرگرمیوں کو مزید مؤثر بنانے کے لیے اسکولوں کے روزانہ اوقاتِ کار میں ایک گھنٹے کا اضافہ کرنے کا فیصلہ کر دیا ہے۔

محکمہ اسکول ایجوکیشن کی جانب سے جاری ہدایات کے مطابق نئے شیڈول پر تمام متعلقہ تعلیمی اداروں کو عمل درآمد یقینی بنانے کی ہدایت کی گئی ہے، حکام کے مطابق روزانہ تدریسی وقت بڑھانے کا مقصد طلبہ کو زیادہ تعلیمی مواقع فراہم کرنا، نصاب کی بروقت تکمیل کو یقینی بنانا اور تدریسی معیار کو مزید بہتر بنانا ہے۔

حکام کا کہنا ہے کہ اضافی وقت کے دوران اساتذہ کو نصاب کی وضاحت، عملی سرگرمیوں، مشقوں اور طلبہ کی تعلیمی رہنمائی کے لیے زیادہ وقت میسر آئے گا، جس سے مجموعی تعلیمی نتائج میں بہتری کی توقع کی جا رہی ہے۔

 یہ بھی پڑھیں :سیکیورٹی خدشات کے باعث اسکردو، لنڈی کوتل اور شمالی وزیرستان میں تعلیمی ادارے مزید دو روز کے لیے بند

محکمہ تعلیم کے مطابق نئے اوقاتِ کار کے تحت تمام سرکاری اور نجی اسکول اپنی روزانہ کی تدریسی سرگرمیوں کو ازسرنو ترتیب دیں گے تاکہ اضافی ایک گھنٹے کا مؤثر استعمال ممکن بنایا جا سکے۔

اسکول انتظامیہ کو نئی ہدایات جاری

محکمہ تعلیم نے متعلقہ اداروں کی انتظامیہ کو ہدایت کی ہے کہ وہ نئے شیڈول کے مطابق کلاسوں، اساتذہ کی ذمہ داریوں اور دیگر انتظامی امور کو منظم کریں تاکہ تدریسی عمل متاثر نہ ہو۔

وزیر تعلیم نے فیصلے کی تصدیق کردی

صوبائی وزیر تعلیم سید سردارعلی شاہ نے بھی سوشل میڈیا پر جاری اپنے بیان میں روزانہ تدریسی اوقات میں اضافے کی تصدیق کرتے ہوئے کہا کہ محکمہ اسکول ایجوکیشن کے فیصلے پرعمل درآمد یقینی بنایا جائے گا۔

انہوں نے کہا کہ حکومت کی کوشش ہے کہ طلبہ کو بہتر تعلیمی ماحول فراہم کیا جائے اور تدریسی عمل کو مزید مؤثر بنایا جائے تاکہ تعلیمی اہداف بروقت حاصل کیے جا سکیں۔

تعلیمی معیار بہتر بنانے کی کوشش

تعلیمی ماہرین کا کہنا ہے کہ اگر اضافی تدریسی وقت کو مؤثر منصوبہ بندی کے ساتھ استعمال کیا گیا تو اس سے طلبہ کی سیکھنے کی صلاحیت، امتحانی تیاری اور نصاب کی تکمیل میں مثبت نتائج سامنے آ سکتے ہیں،محکمہ تعلیم نے تمام تعلیمی اداروں سے کہا ہے کہ وہ نئے اوقاتِ کار پر مکمل عمل درآمد کرتے ہوئے تدریسی معیار کو مزید بہتر بنانے کے لیے ضروری اقدامات کریں۔