سام سنگ نے صارفین کو بڑا سرپرائز دیدیا ، کمپنی ایک بار پھر پریمیم وائرلیس ہیڈ فونز کی مارکیٹ میں واپسی کی تیاری کررہی ہے ۔
میڈیا رپورٹ کے مطابق کمپنی کے نئے ہیڈ فونز سے متعلق ابتدائی معلومات سامنے آئی ہیں، اگر یہ منصوبہ عملی شکل اختیار کرتا ہے تو سام سنگ کا مقابلہ ایپل کے ایئر پوڈز میکس اور سونی کی ڈبلیو ایچ-1000 ایکس ایم سیریز جیسے معروف ہیڈ فونز سے ہوگا۔
رپورٹس کے مطابق نئے ہیڈ فونز کو فی الحال گیلیکسی ایچ ون کے نام سے شناخت کیا جارہا ہے اور اس نام کے شواہد سام سنگ کی گیلیکسی ویئرایبل ایپ میں ملے ہیں ، اس ایپ میں موجود بعض کنکشن اسٹیٹس آئیکنز نے اس نئے ڈیوائس کی موجودگی کی طرف اشارہ کیا ہے۔
سامنے آنے والے آئیکنز سے اندازہ ہوتا ہے کہ یہ اوور ایئر وائرلیس ہیڈ فونز ہوسکتے ہیں، لیک ہونے والی تصاویر میں سفید، سرمئی اور سیاہ رنگ کے ڈیزائن نظر آتے ہیں ، کچھ گرافکس میں ایئر کشنز کے لیے سرمئی اور سبز رنگ بھی دکھائی دیتا ہے۔
تصاویر کے مطابق ہیڈ فونز میں نسبتاً چوڑا ہیڈ بینڈ دیا جاسکتا ہے، اس کے ساتھ بڑے ایئرکپس بھی نظر آتے ہیں تاہم یہ بات ابھی حتمی نہیں ہے کہ مارکیٹ میں آنے والے ہیڈ فونز کا ڈیزائن بالکل ایسا ہی ہوگا کیونکہ ابتدائی تصاویر اور ایپ کے آئیکنز عام طور پر حتمی مصنوعات کی مکمل نمائندگی نہیں کرتے۔
سام سنگ کی جانب سے اس نئے ڈیوائس کے ممکنہ فیچرز کے بارے میں بھی مختلف اطلاعات سامنے آئی ہیں ، ان میں ایکٹو نوائز کینسلیشن یعنی اے این سی شامل ہے جس کی مدد سے صارف بیرونی شور کو کم کرکے موسیقی یا دیگر آڈیو زیادہ واضح انداز میں سن سکتا ہے۔
نئے ہیڈفونز کی خصوصیات
نئے ہیڈ فونز میں ایمبیئنٹ ساؤنڈ موڈ بھی شامل کیے جانے کا امکان ہے جس کے ذریعے صارف ہیڈ فون اتارے بغیر اپنے اردگرد کی آوازیں سن سکتا ہے ، اس کے علاوہ جدید بلوٹوتھ کنیکٹیویٹی اور گیلیکسی ڈیوائسز کے درمیان خودکار سوئچنگ بھی ممکنہ فیچرز میں شامل ہیں۔
رپورٹس میں اے آئی اسسٹنٹ کا ذکر بھی شامل ہے اور اگر یہ فیچر شامل کیا جاتا ہے تو صارف ہیڈ فونز کے ذریعے گیلیکسی ایکو سسٹم میں موجود اے آئی سہولیات تک زیادہ آسانی سے رسائی حاصل کرسکیں گے تاہم ابھی ان تمام فیچرز کی باضابطہ تصدیق نہیں ہوئی۔
سام سنگ اپنے سیم لیس کوڈیک کو بھی نئے ہیڈ فونز کا حصہ بنا سکتا ہے، یہ ٹیکنالوجی مطابقت رکھنے والی گیلیکسی ڈیوائسز کے ساتھ بہتر اور ہائی ریزولوشن آڈیو فراہم کرنے کے لیے استعمال ہوتی ہے۔
اس فیچر کی موجودگی سام سنگ کے نئے ہیڈ فونز کو پریمیم آڈیو صارفین کے لیے زیادہ پرکشش بنا سکتی ہے۔
سام سنگ کی پریمیم ہیڈ فونز کے شعبے میں واپسی طویل عرصے بعد ہورہی ہے ، کمپنی نے 2015 میں لیول آن وائرلیس پرو ہیڈ فونز متعارف کرائے تھے، اب گیلیکسی برانڈ کے تحت واپسی کمپنی کی آڈیو حکمت عملی میں ایک اہم تبدیلی ہوسکتی ہے۔
ان ہیڈفونز کی واپسی کی خبریں صارفین کی توجہ حاصل کررہی ہیں لیکن حتمی تاریخ، قیمت اور مکمل تفصیلات کے لیے صارفین کو سام سنگ کے باضابطہ اعلان کا انتظار کرنا ہوگا۔
By 
