ایس ای سی پی کا بڑا فیصلہ، اسٹاک مارکیٹ اکاؤنٹ اب صرف 24 گھنٹے میں کھلے گا

 پاکستان اسٹاک مارکیٹ میں سرمایہ کاری کے خواہش مند افراد کے لیے اہم سہولت متعارف کرادی گئی ہے۔ سیکورٹیز اینڈ ایکسچینج کمیشن آف پاکستان نے اسٹاک مارکیٹ میں اکاؤنٹ کھولنے کے عمل کو مزید آسان اور تیز بنانے کے لیے نیا ڈیجیٹل آن بورڈنگ فریم ورک متعارف کرا دیا ہے۔

نئے نظام کے تحت سہولت اکاؤنٹ اب صرف ایک دن میں کھولا جاسکے گا جبکہ انویسٹر اکاؤنٹ کی درخواست پر زیادہ سے زیادہ دو دن کے اندر حتمی فیصلہ کیا جائے گا۔ اس اقدام کا مقصد ٹیکنالوجی کے ذریعے عام شہریوں کے لیے کیپٹل مارکیٹ تک رسائی آسان بنانا اور سرمایہ کاری کے عمل کو مزید شفاف بنانا ہے۔

نئے ڈیجیٹل نظام کے تحت سرمایہ کار 24 گھنٹے کسی بھی وقت اکاؤنٹ کھولنے کے لیے درخواست دے سکیں گے۔ درخواست جمع کرانے اور اس کی جانچ پڑتال کا عمل بھی ڈیجیٹل طریقے سے انجام دیا جائے گا جس سے سرمایہ کاروں کو روایتی طریقہ کار کے مقابلے میں زیادہ سہولت ملے گی۔

سرمایہ کار اپنی درخواست کی پیش رفت بھی آن لائن دیکھ سکیں گے۔ اس مقصد کے لیے انہیں ایک ٹریکنگ آئی ڈی فراہم کی جائے گی جس کے ذریعے درخواست کا موجودہ اسٹیٹس معلوم کیا جاسکے گا۔

 یہ بھی پڑھیں :خام تیل کی قیمتوں میں دھماکا خیز اضافے نے دنیا بھر کی اسٹاک مارکیٹو ں کو ہلا کر رکھ دیا

نئے فریم ورک میں سرمایہ کاروں کے حقوق کے تحفظ کے لیے بھی ایک اہم شرط شامل کی گئی ہے۔ اگر کوئی بروکر کسی درخواست کو مسترد کرتا ہے تو اسے درخواست مسترد کرنے کی وجوہات تحریری طور پر فراہم کرنا ہوں گی۔ اس اقدام سے سرمایہ کاری کے عمل میں شفافیت بڑھنے اور درخواست دہندگان کو فیصلے کی وجہ معلوم ہونے میں مدد ملے گی۔

ایس ای سی پی کے مطابق ایسے سرمایہ کار جو پہلے ہی تصدیق شدہ ہیں انہیں دوبارہ تصدیقی عمل سے گزرنے کی ضرورت نہیں ہوگی۔ اس سہولت کے نتیجے میں پہلے سے تصدیق شدہ صارفین کے لیے اکاؤنٹ کھولنے کا عمل مزید مختصر ہوسکے گا۔

سیکورٹیز اینڈ ایکسچینج کمیشن آف پاکستان کے چیئرمین ڈاکٹر کبیر احمد سدھو نے کہا ہے کہ ٹیکنالوجی کے استعمال کے ذریعے اسٹاک مارکیٹ میں سرمایہ کاری کے عمل کو انتہائی آسان بنانے کی کوشش کی جارہی ہے۔

ان کے مطابق اس اقدام کا ایک اہم مقصد نوجوانوں کی اسٹاک مارکیٹ میں شمولیت بڑھانا ہے۔ انہوں نے کہا کہ ایس ای سی پی مارکیٹ میں سرمایہ کاروں کی تعداد کو 25 لاکھ تک لے جانے کا ہدف رکھتا ہے۔

  یہ بھی پڑھیں :شہباز شریف کا عالمی معیشت کے لیے آکسیجن ثابت، اسٹاک مارکیٹس میں تیزی

ایس ای سی پی چیئرمین کا کہنا تھا کہ پاکستان کی کیپٹل مارکیٹ میں ترقی اور سرمایہ کاری کے وسیع امکانات موجود ہیں۔ جدید ڈیجیٹل نظام کے ذریعے زیادہ سے زیادہ افراد کو سرمایہ کاری کے مواقع سے جوڑنے میں مدد مل سکتی ہے۔

نئے فریم ورک کے تحت اکاؤنٹ کھولنے کے عمل میں وقت کم کرنے کے ساتھ ساتھ درخواستوں کی نگرانی اور بروکرز کی جانب سے کیے جانے والے فیصلوں میں شفافیت لانے پر بھی توجہ دی گئی ہے۔

اس نظام کے ذریعے سرمایہ کاروں کو درخواست جمع کرانے کے بعد اس کی پیش رفت جاننے کے لیے بار بار متعلقہ اداروں یا بروکرز سے رابطہ کرنے کی ضرورت بھی کم ہوجائے گی۔ آن لائن ٹریکنگ کے ذریعے درخواست کی صورتحال براہ راست معلوم کی جاسکے گی۔

 یہ بھی پڑھیں :کاروبار شروع کرنا اور سرمایہ کاری اب اور بھی آسان، ایس آئی ایف سی نے پیچیدہ قواعد و ضوابط کا خاتمہ کردیا

ایس ای سی پی کے اس اقدام کو پاکستان کی کیپٹل مارکیٹ میں ڈیجیٹل سہولیات کے فروغ کی جانب ایک اہم پیش رفت قرار دیا جارہا ہے۔ نئے نظام کے تحت تیز رفتار اکاؤنٹ کھولنے اور آسان درخواست کے عمل سے ملک میں اسٹاک مارکیٹ تک عام شہریوں کی رسائی بڑھانے کی کوشش کی گئی ہے۔