مینز جونیئر ایشیا کپ 2026: پاکستان کی کامیابیوں کاسفر جاری، ملائیشیا کو ہرا کر سیمی فائنل میں پہنچ گیا

مینز جونیئر ایشیا کپ 2026 کے پول بی کے اہم میچ میں پاکستان نے ملائیشیا کو 2 کے مقابلے میں 5 گول سے شاندار شکست دے کر ایونٹ کے سیمی فائنل کے لیے کوالیفائی کر لیا ہے۔

میچ کے پہلے ہاف میں 1 گول کے خسارے کے بعد قومی ٹیم نے دوسرے ہاف میں مسلسل 5 گول داغ کر ایونٹ میں اپنی مسلسل تیسری فتح اور ناقابلِ شکست رہنے کا اعزاز برقرار رکھا۔

میچ کا آغاز انتہائی سنسنی خیز انداز میں ہوا جہاں ملائیشیا کے محمد صالح نے 9ویں منٹ میں گول اسکور کر کے اپنی ٹیم کو 0-1 کی برتری دلا دی۔

What a goal by waleed Rana Infront of goal, receiving a well hit ball from outside 25 meters Infront of goal and angling it to beat the defender and goal keeper to score Pakistans 3rd goal against malaysia @asia_hockey junior Asia cup 2026. pic.twitter.com/dWd12mWfsi

— Dr. Adnan (@dr_adnann) September 8, 2026

پہلے ہاف تک ملائیشین ٹیم حریف پر حاوی نظر آئی، لیکن کھیل کے دوسرے ہاف میں پاکستان جونیئر ہاکی ٹیم نے انتہائی جارحانہ حکمت عملی اپنائی۔

یہ بھی پڑھیں:پاکستان ہاکی کے سنہری دور کی واپسی، جونیئر ایشیا کپ میں شاہینوں نے مخالف ٹیم پر15 گول داغ دیے

پاکستان کی جانب سے کم بیک کا آغاز 32ویں منٹ میں ہوا جب ندیم خان نے ایک شاندار گول کر کے مقابلے کو 1-1 سے برابر کر دیا۔ اس برابری کے بعد پاکستانی کھلاڑیوں نے ملائیشیا کے دفاعی حصار پر دباؤ مسلسل بڑھا دیا۔

ولید رانا اور علی حمزہ کی گولز کی برسات

برابری کا گول ہوتے ہی قومی کھلاڑیوں کے کھیل میں مزید جارحانہ پن آگیا اور 36ویں منٹ میں عبداللہ سمیع رانا نے گیند کو جال کی راہ دکھا کر پاکستان کو 1-2 کی برتری دلا دی۔ اس کے فوراً بعد ولید رانا نے بہترین انفرادی کھیل کا مظاہرہ کیا۔

ولید رانا نے 39ویں اور 40ویں منٹ میں بیک ٹو بیک دو خوبصورت گول داغ کر میچ پر پاکستان کی گرفت مکمل طور پر مضبوط کر دی۔

ابھی ملائیشین ٹیم اس صدمے سے سنبھل بھی نہ پائی تھی کہ 41ویں منٹ میں علی حمزہ نے پانچواں گول کر کے اسکور 1-5 کر دیا۔ میچ کے 54ویں منٹ میں ملائیشیا کے گناسیلن دھیرش نے دوسرا گول کر کے خسارہ کچھ کم کیا، لیکن پاکستان نے کھیل کے اختتام تک 2-5 سے فتح اپنے نام رکھی۔

مزید پڑھیں:حکومت کا پاکستان جونیئر ہاکی ٹیم کو بھارت نہ بھیجنے کا فیصلہ

مینز جونیئر ایشیا کپ میں پاکستان ہاکی ٹیم کا شمار ہمیشہ سے سرفہرست اور مضبوط ترین ٹیموں میں ہوتا رہا ہے۔ جاری ایونٹ میں بھی قومی جونیئر ٹیم بہترین ردھم اور مکمل تیاری کے ساتھ میدان میں اتری ہے۔

پول بی میں اس اہم کامیابی سے قبل پاکستان نے اپنے دونوں ابتدائی میچز میں بہترین کھیل پیش کیا تھا۔ ملائیشیا کے خلاف یہ کامرانی ایونٹ میں قومی ٹیم کی مسلسل تیسری فتح ہے، جس کی بدولت پاکستان نے بغیر کوئی میچ ہارے سیمی فائنل کے لیے اپنی جگہ باقاعدہ پکی کر لی ہے۔

واضح رہے کہ پہلے ہاف میں خسارے کا شکار ہونے کے بعد جس طرح پاکستانی جونیئر کھلاڑیوں نے دوسرے ہاف میں اٹیکنگ ہاکی کھیلی، وہ ان کے بہترین جسمانی معیار اور ذہنی مضبوطی کا ثبوت ہے۔

مزید پڑھیں:قوم کیلئے بڑی خوشخبری،24 سال بعد پاکستان میں ہاکی کے کھیل کی واپسی

ہاف ٹائم کے بعد محض 10 منٹ کے اندر 5 گول داغنا یہ ظاہر کرتا ہے کہ ڈریسنگ روم میں بنائی گئی حکمت عملی انتہائی موثر اور حریف کی کمزوریوں کے عین مطابق تھی۔

واضح رہے کہ سیمی فائنل اور فائنل جیسے بڑے اعصاب شکن معرکوں سے قبل میچ کے ابتدائی منٹوں میں گول کھانے کی کمزوری پر قابو پانا ضروری ہو گا تاکہ مضبوط حریفوں کے خلاف کسی بھی قسم کا غیر ضروری دباؤ پیدا نہ ہو۔