خیبرپختونخوا میں بدامنی عروج پر ہے، گورننس ختم ہوگئی ہے،گورنر خیبرپختونخوا فیصل کریم کنڈی

گورنر خیبرپختونخوا فیصل کریم کنڈی نے کہا ہے کہ خیبرپختونخوا میں بدامنی عروج پر ہے، گورننس ختم ہوگئی ہے اور صوبائی حکومت کی پالیسی صوبے کو مزید تباہ کر رہی ہے۔

گورنر خیبرپختونخوا فیصل کریم کنڈی نے حیات آباد میڈیکل کمپلیکس کا دورہ کیا، جہاں انہوں نے دہشتگردوں کی فائرنگ سے زخمی ہونے والے اینٹی نارکوٹکس فورس (اے این ایف) کے اسسٹنٹ ڈائریکٹر وقاص احمد اعوان کی عیادت کی۔

اے این ایف اسسٹنٹ ڈائریکٹر وقاص احمد اعوان حیات آباد کے قریب دہشتگردوں کی فائرنگ سے زخمی ہوئے تھے۔ کمانڈر اینٹی نارکوٹکس فورس بریگیڈیئر مظہر بھی گورنر خیبرپختونخوا کے ہمراہ موجود تھے۔

یہ بھی پڑھیں: خیبر پختونخوا کے 97 ارب روپے کے شہری ترقیاتی منصوبے میں مالی بے ضابطگیوں کی تحقیقات، نیب نے 3 ٹھیکیدار اداروں کو طلب کرلیا

گورنر فیصل کریم کنڈی نے زخمی اے این ایف افسر کو بہادری پر خراج تحسین پیش کیا اور ان کی جلد صحت یابی کے لیے دعا کی۔

اس موقع پر میڈیا سے گفتگو کرتے ہوئے گورنر خیبرپختونخوا نے کہا کہ قانون نافذ کرنے والے اداروں کے اہلکار دہشتگردوں کے ٹارگٹ پر ہیں۔

فیصل کریم کنڈی نے کہا کہ صوبائی حکومت ملک میں انتشار، فساد اور افراتفری پھیلانے میں سرگرم ہے۔