دنیا میں کچھ بھی ہو، پاکستان سے تعلقات مضبوط کریں گے، چین کا بڑا اعلان

چین نے پاکستان کے ساتھ دیرینہ دوستی اور اسٹریٹیجک شراکت داری مزید مضبوط بنانے کے عزم کا اظہار کرتے ہوئے کہا ہے کہ عالمی حالات جیسے بھی ہوں، پاک چین تعلقات مستحکم رہیں گے۔

کراچی میں عوامی جمہوریہ چین کے قیام کی 77ویں سالگرہ کی تقریب سے خطاب کرتے ہوئے قائم مقام چینی قونصل جنرل فینگ دیہنگ نے پاک چین تعلقات کو باہمی اعتماد، تعاون اور بھائی چارے پر مبنی قرار دیا۔

پاکستان اور چین اچھے ہمسائے اور بھائی ہیں

قائم مقام چینی قونصل جنرل فینگ دیہنگ نے کہا کہ چین اور پاکستان ایسے اچھے ہمسائے ہیں جو پہاڑوں اور دریاؤں سے جڑے ہوئے ہیں۔

انہوں نے کہا کہ دونوں ممالک اچھے دوست ہیں جو اعتماد کے رشتے کے ساتھ باہمی معاونت کررہے ہیں۔

فینگ دیہنگ کے مطابق پاکستان اور چین ایسے بھائی ہیں جو دکھ سکھ کے ساتھی ہیں اور ایک دوسرے کے مفادات کا تحفظ کرتے ہیں۔

  یہ بھی پڑھیں :پاکستانی فوج قومی استحکام کا ستون اور پاک چین دوستی و تعاون کی مضبوط محافظ ہے، چینی وزارت خارجہ

انہوں نے کہا کہ دونوں ممالک کے درمیان اعلیٰ سطح کا سیاسی اور سکیورٹی تعاون موجود ہے جبکہ عالمی سطح پر بھی دونوں ملک ایک دوسرے کے ساتھ اشتراک کررہے ہیں۔

دنیا میں کچھ بھی ہو، تعلقات مضبوط رہیں گے

چینی قونصل جنرل نے واضح کیا کہ عالمی حالات میں چاہے کتنی ہی تبدیلیاں کیوں نہ آئیں، چین پاکستان کے ساتھ اپنے تعلقات کو مزید مضبوط کرے گا۔

انہوں نے کہا کہ چین دونوں ممالک کی قیادت کے درمیان طے پانے والی مشترکہ مفاہمت کو عملی شکل دینے کے لیے پرعزم ہے۔

فینگ دیہنگ کے مطابق چین پاکستان کے درمیان کمیونٹی کی سطح پر رابطوں کو بھی مزید فروغ دینا چاہتا ہے۔

انہوں نے کہا کہ عالمی منظرنامے میں موجود بے یقینیوں کا جواب چین پاکستان تعلقات کی یقینی اور مضبوطی سے دیا جاسکتا ہے۔

سی پیک ٹو پر کام تیز کرنے کا اعلان

پاک چین اقتصادی راہداری کے حوالے سے فینگ دیہنگ نے کہا کہ اپ گریڈڈ سی پیک ٹو کی تعمیر کے عمل میں تیزی لائی جارہی ہے۔

انہوں نے صنعت، زراعت، کان کنی اور انفارمیشن ٹیکنالوجی سمیت مختلف شعبوں میں تعاون بڑھانے کی ضرورت پر زور دیا۔

چینی قونصل جنرل نے کہا کہ تعلیم، ثقافت، سائنس اور ٹیکنالوجی کے شعبوں میں دونوں ملکوں کے درمیان تبادلوں کو بھی وسیع کیا جانا چاہیے۔

ان کے مطابق دونوں ممالک کے درمیان باہمی طور پر فائدہ مند تعاون کو فروغ دینا عوام کے لیے عملی فوائد کا باعث بن سکتا ہے۔

سندھ میں چینی سرمایہ کاری بڑھانے کا عزم

وزیراعلیٰ سندھ سید مراد علی شاہ نے تقریب سے خطاب کرتے ہوئے کہا کہ سی پیک نے رابطوں، توانائی، صنعت اور بنیادی ڈھانچے کے ذریعے پاکستان کی ترقی میں کردار ادا کیا ہے۔

انہوں نے بتایا کہ سندھ میں توانائی، بندرگاہوں، صنعت اور زراعت سمیت مختلف شعبوں میں چینی سرمایہ کاری بڑھ رہی ہے۔

 یہ بھی پڑھیں :دنیا ’انقلابی تبدیلیوں‘ سے گزر رہی ہے لیکن پاک چین دوستی مزید مضبوط ہو رہی ہے، صدر آصف علی زرداری

مراد علی شاہ نے کہا کہ سندھ حکومت قابل تجدید توانائی اور جدید شہری ترقی کے شعبوں میں چین کے ساتھ تعاون مزید بڑھانا چاہتی ہے۔

انہوں نے چینی سرمایہ کاروں کو سازگار ماحول فراہم کرنے کے حکومتی عزم کی بھی یقین دہانی کرائی۔

گورنر سندھ نے پاک چین دوستی کو سراہا

گورنر سندھ سید محمد نہال ہاشمی نے بطور مہمان خصوصی تقریب سے خطاب کرتے ہوئے کہا کہ پاکستان اور چین کی دوستی ہر آزمائش میں ثابت قدم رہی ہے۔

انہوں نے سی پیک کو دونوں ملکوں کے دیرینہ دوستانہ تعلقات کا عملی مظہر قرار دیا۔

گورنر سندھ کے مطابق پاک چین تعاون اب بنیادی ڈھانچے سے آگے بڑھ کر صنعت، ٹیکنالوجی، زراعت اور جدت کے شعبوں تک پھیل رہا ہے۔

انہوں نے کہا کہ پاکستان اور چین کی مضبوط دوستی خطے میں امن، استحکام اور خوشحالی کے لیے بھی اہم ہے۔

علاقائی تنازعات میں پاکستان کے کردار کی تعریف

چینی قونصل جنرل نے علاقائی تنازعات کا نام لیے بغیر کہا کہ پاکستان ایک منفرد ثالثی کا کردار ادا کررہا ہے۔

انہوں نے اس کردار پر پاکستان کو مبارک باد بھی پیش کی۔

فینگ دیہنگ نے کہا کہ چین عالمی سطح پر امن، استحکام اور ترقی کے لیے اپنی ذمہ داریاں ادا کررہا ہے۔

انہوں نے سیاسی مذاکرات اور کشیدگی کا سامنا کرنے والے خطوں میں سیاسی سمجھوتے کو فروغ دینے کی چینی پالیسی کا بھی ذکر کیا۔

چین کی معاشی اور ٹیکنالوجی ترقی کا ذکر

چینی قونصل جنرل نے کہا کہ چین نے تاریخی پیش رفت کے ذریعے ایک پسماندہ ملک سے دنیا کی دوسری بڑی معیشت تک کا سفر طے کیا۔

انہوں نے کہا کہ چین کئی برس سے دنیا کا سب سے بڑا مینوفیکچرر اور تاجر ہے، جبکہ ملک نے انتہائی غربت کے خاتمے سمیت مختلف شعبوں میں نمایاں پیش رفت کی ہے۔

فینگ دیہنگ کے مطابق چین مصنوعی ذہانت، گرین انرجی، کوانٹم ٹیکنالوجی، خلائی تحقیق اور توانائی کے نئے شعبوں میں بھی پیش رفت کررہا ہے۔

انہوں نے بتایا کہ چین 160 سے زائد ممالک کا بڑا تجارتی شراکت دار ہے اور بیلٹ اینڈ روڈ تعاون سے دنیا کے متعدد ممالک مستفید ہورہے ہیں۔

پاک چین شراکت داری نئی بلندیوں تک لے جانے پر زور

تقریب کے اختتام پر چینی قونصل جنرل نے کہا کہ دنیا کو پیچیدہ نوعیت کے چیلنجز کا سامنا ہے، تاہم امن، ترقی اور تعاون کا رجحان روکا نہیں جاسکتا۔

انہوں نے کہا کہ دونوں ممالک کو ماضی کی کامیابیوں کو بنیاد بناتے ہوئے پاک چین شراکت داری کو نئی بلندیوں تک لے جانا چاہیے۔

فینگ دیہنگ کے مطابق مستقبل میں دونوں ملکوں کے درمیان اقتصادی، تجارتی، صنعتی، سائنسی اور ثقافتی تعاون کو مزید وسعت دینے کی ضرورت ہے۔