آج دنیا بھر میں عالمی یومِ قلب منایا جارہا ہے جس کا مقصد دل کی بیماریوں ان کے خطرات اور بروقت تشخیص و علاج کے بارے میں عوامی شعور اجاگر کرنا ہے ہارٹ اٹیک کو صرف اچانک اور شدید سینے کے درد سے جوڑنا درست نہیں کیونکہ بعض افراد میں اس کی علامات نسبتاً ہلکی مختلف یا بعض اوقات تقریباً غیر محسوس بھی ہوسکتی ہیں۔ امریکی ہارٹ ایسوسی ایشن کے مطابق بعض ہارٹ اٹیک خاموش بھی ہوسکتے ہیں جن کا پتا بعد میں طبی معائنے یا ٹیسٹ کے ذریعے چلتا ہے۔
ہارٹ اٹیک اس وقت ہوتا ہے جب دل کے پٹھوں تک خون اور آکسیجن کی فراہمی اچانک کم یا بند ہوجاتی ہے۔ اس کی ایک بڑی وجہ دل کو خون پہنچانے والی شریان میں رکاوٹ پیدا ہونا ہے بروقت طبی امداد نہ ملنے کی صورت میں دل کے پٹھے کو مستقل نقصان پہنچ سکتا ہے اسی لیے علامات کو پہچاننا اور فوری کارروائی انتہائی اہم ہے۔
ہارٹ اٹیک سے پہلے یا اس کے دوران جسم میں ظاہر ہونے والی 10 اہم نشانیاں
1۔ سینے میں دباؤ، جکڑن یا درد
یہ ہارٹ اٹیک کی سب سے معروف علامت ہے۔ سینے کے درمیان دباؤ بھاری پن جکڑن یا درد محسوس ہوسکتا ہے یہ کیفیت چند منٹ تک برقرار رہ سکتی ہے یا ختم ہوکر دوبارہ شروع ہوسکتی ہے۔
2۔ درد کا بازو، کندھے، گردن یا جبڑے تک پھیلنا
ضروری نہیں کہ تکلیف صرف سینے تک محدود رہے درد یا دباؤ ایک یا دونوں بازوؤں کندھ گردن، جبڑے، کمر یا بعض اوقات معدے کے حصے تک محسوس ہوسکتا ہے۔
3۔ اچانک سانس پھولنا
سینے میں درد نہ ہونے کے باوجود سانس لینے میں دشواری یا معمول سے زیادہ سانس پھولنا بھی دل کے شدید مسئلے کی علامت ہوسکتا ہے۔
4۔ ٹھنڈا پسینہ آنا
اچانک غیر معمولی یا ٹھنڈا پسینہ آنا خصوصاً دیگر علامات کے ساتھ نظر انداز نہیں کرنا چاہیے۔
بعض افراد، خصوصاً خواتین میں ہارٹ اٹیک کے دوران متلی، قے یا معدے کی خرابی جیسی کیفیت بھی سامنے آسکتی ہے جسے بعض اوقات عام معدے کی بیماری سمجھ لیا جاتا ہے۔
6۔ چکر آنا یا اچانک کمزوری محسوس ہونا
اچانک چکر، ہلکا پن یا شدید کمزوری بھی ہارٹ اٹیک کے ساتھ ہوسکتی ہے، خاص طور پر جب اس کے ساتھ سانس پھولنے یا سینے کی تکلیف جیسی علامات موجود ہوں۔
7۔ غیر معمولی تھکن
ایسی تھکن جو معمول کی مصروفیت کے مقابلے میں غیر معمولی ہو اور اس کی کوئی واضح وجہ سمجھ نہ آئے، بعض افراد میں دل کے مسئلے کی علامت ہوسکتی ہے۔ امریکی ہارٹ ایسوسی ایشن کے مطابق خواتین میں غیر معمولی تھکن ہارٹ اٹیک کی کم معروف علامات میں شامل ہوسکتی ہے۔
8۔ بدہضمی یا سینے میں جلن جیسی کیفیت
ہارٹ اٹیک کی تکلیف بعض اوقات بدہضمی، سینے کی جلن یا معدے کے مسئلے جیسی محسوس ہوسکتی ہے۔ اسی لیے اگر ایسی کیفیت غیر معمولی ہو یا دیگر علامات کے ساتھ ہو تو اسے محض گیس یا تیزابیت سمجھ کر نظر انداز نہیں کرنا چاہیے۔
9۔ کمر، کندھے یا اوپری جسم میں غیر معمولی تکلیف
کچھ افراد میں سینے کے بجائے کمر، کندھے، بازو یا جبڑے میں درد یا دباؤ زیادہ نمایاں ہوسکتا ہے۔
10۔ دل کی دھڑکن میں غیر معمولی کیفیت یا بے چینی
دل کا تیز یا بے ترتیب دھڑکنا، گھبراہٹ، کمزوری یا یہ احساس کہ جسم میں کچھ غیر معمولی ہورہا ہے، بعض مریضوں میں ہارٹ اٹیک کے ساتھ ظاہر ہوسکتا ہے۔ تاہم ایسی علامات کی بہت سی دوسری وجوہات بھی ہوسکتی ہیں، اس لیے خود تشخیص کے بجائے طبی مدد لینا ضروری ہے۔
خاموش ہارٹ اٹیک بھی خطرناک ہے
طبی ماہرین کا کہنا ہے کہ ہر ہارٹ اٹیک فلموں میں دکھائے جانے والے شدید سینے کے درد کی طرح ظاہر نہیں ہوتا۔ بعض افراد میں علامات ہلکی ہوسکتی ہیں، جبکہ بعض میں تقریباً کوئی واضح علامت نہیں ہوتی۔ امریکی ہارٹ ایسوسی ایشن کے مطابق ایسے واقعات کو ’’سائلنٹ ہارٹ اٹیک‘‘ کہا جاتا ہے اور یہ بھی دل کو نقصان پہنچا سکتے ہیں۔
خواتین میں بعض اوقات سینے کے درد کے بجائے سانس پھولنا، غیر معمولی تھکن، متلی، کمر یا کندھے کی تکلیف جیسی کم معروف علامات زیادہ نمایاں ہوسکتی ہیں، جس کے باعث علامات کو عام تھکن، معدے کی خرابی یا کسی اور مسئلے سے جوڑ دیا جاتا ہے۔
ہارٹ اٹیک کا شبہ ہو تو انتظار نہ کریں
اگر کسی شخص کو سینے میں دباؤ یا جکڑن کے ساتھ سانس پھولنے، ٹھنڈا پسینہ آنے، متلی، چکر یا درد کے بازو، کمر، گردن یا جبڑے تک پھیلنے جیسی علامات ہوں تو اسے فوری طبی امداد حاصل کرنی چاہیے۔ ہارٹ اٹیک ایک طبی ہنگامی صورتحال ہے اور بروقت علاج دل کے نقصان کو کم کرنے میں مدد دے سکتا ہے۔
ایسی صورت میں مریض کو خود گاڑی چلا کر اسپتال لے جانے کے بجائے مقامی ایمرجنسی سروس سے رابطہ کرنا زیادہ محفوظ ہے۔ انتظار کے دوران مریض کو آرام دہ حالت میں رکھیں اور ایمرجنسی طبی عملے کی ہدایات پر عمل کریں۔
عالمی یومِ قلب کا پیغام
ورلڈ ہارٹ فیڈریشن کے مطابق دنیا بھر میں دل اور خون کی شریانوں سے متعلق بیماریاں اموات کی ایک بڑی وجہ ہیں تاہم ان میں سے بہت سے خطرات کو بروقت توجہ صحت مند طرز زندگی اور مناسب طبی نگہداشت کے ذریعے کم کیا جاسکتا ہے۔ عالمی یومِ قلب 2026 کا پیغام بھی اسی جانب توجہ دلاتا ہے کہ دل کی بیماری ہمیشہ واضح علامات کے ساتھ سامنے نہیں آتی۔
اس عالمی دن پر ماہرین کا بنیادی پیغام یہی ہے کہ سینے کے درد کا انتظار نہ کریں اگر جسم میں اچانک ایسی غیر معمولی علامات ظاہر ہوں جو دل کے مسئلے کی طرف اشارہ کرسکتی ہیں تو انہیں معمولی سمجھنے کے بجائے فوری طبی مدد حاصل کریں۔ دل کی بیماری میں بروقت اقدام زندگی بچانے میں اہم کردار ادا کرسکتا ہے
