فوٹو اور ویڈیو شیئرنگ کی عالمی سطح پر مقبول ایپ انسٹاگرام نے اب شارٹ ویڈیو سے آگے بڑھ کر طویل مواد کی دنیا میں قدم رکھ دیا ہے۔
پلیٹ فارم نے یوٹیوب کی اجارہ داری کو براہِ راست چیلنج کرتے ہوئے ایک نیا فارمیٹ متعارف کرانے کی تیاری شروع کر دی ہے، جس کے تحت منتخب کریئیٹرز اب 90 منٹ (ڈیڑھ گھنٹے) تک کی ہوریزنٹل (افقی) ویڈیوز اپ لوڈ کر سکیں گے۔
اس نئے اور منفرد فیچر کو ’فیچرز‘ (Features) کا نام دیا گیا ہے۔ اس کا بنیادی مقصد پوڈکاسٹرز، انٹرویو ہوسٹس، کامیڈینز اور ڈاکومنٹری میکرز کو ایک ایسا پلیٹ فارم فراہم کرنا ہے جہاں وہ اپنے لمبے اور تفصیلی مواد کو بغیر کسی وقت کی پابندی یا کٹوتی کے آسانی سے پیش کر سکیں۔
کیسے اور کہاں آزمائش ہو رہی ہے؟
سوشل میڈیا رپورٹس کے مطابق انسٹاگرام فی الحال اس فیچر کو ایک تجرباتی مرحلے کے طور پر چلا رہا ہے ، محدود رسائی: فی الوقت اس فیچر کی آزمائش امریکہ میں منتخب کریئیٹرز کے ایک مخصوص گروہ کے ساتھ کی جا رہی ہے، جبکہ اس سے قبل برازیل میں بھی اس کا ابتدائی ٹیسٹ کیا جا چکا ہے۔
انسٹاگرام انتظامیہ کا کہنا ہے کہ ٹیسٹنگ کے دوران صارفین اور کریئیٹرز کے ردِعمل کو مدنظر رکھا جائے گا، جس کے بعد اسے دنیا بھر کے تمام عام صارفین کے لیے رول آؤٹ کرنے کا حتمی فیصلہ ہوگا۔
انسٹاگرام سربراہ کا خصوصی ویڈیو میں اعلان
انسٹاگرام کے سربراہ ایڈم موسیری اور نائب صدر برائے مصنوعات ٹیسا لیونز نے ایک خصوصی ویڈیو پیغام میں اس نئے فارمیٹ کا باقاعدہ اعلان کیا، ایڈم موسیری کا کہنا تھا کہ انسٹاگرام اب طویل دورانیے کی ویڈیوز میں بڑی سرمایہ کاری کر رہا ہے، ’فیچرز‘ کو ریلز، سیریز اور لائیو سمیت پلیٹ فارم کے دیگر تمام موجودہ ویڈیو فارمیٹس کا حصہ بنایا جائے گا ، ہم کریئیٹرز کو یہ موقع دینا چاہتے ہیں کہ وہ اپنی قائم شدہ کمیونٹی اور فالوورز کے ساتھ زیادہ تفصیلی، معیاری اور گہرا رابطہ قائم کر سکیں۔”
یہ فیچر امریکا، بھارت اور میکسیکو کے بعض کریئیٹرز کے لیے متعارف کرایا گیا ہے، جبکہ مستقبل میں اسے مزید ممالک تک توسیع دینے کا امکان ہے۔
کریئیٹرز اور سوشل میڈیا کی دنیا پر اثرات
اب تک طویل ویڈیوز اور پوڈکاسٹس کے لیے یوٹیوب ہی واحد اور سب سے بڑا مرکز سمجھا جاتا تھا تاہم انسٹاگرام کے اس قدم کے بعد کریئیٹرز کو اپنے فالوورز کو کسی دوسری ایپ پر بھیجنے کے بجائے انسٹاگرام پر ہی روکے رکھنے کا زبردست موقع ملے گا۔
ٹیکنالوجی ماہرین کا ماننا ہے کہ اگر یہ فیچر مکمل طور پر لانچ ہو جاتا ہے تو یہ ڈیجیٹل ویڈیو مارکیٹ کا دھارا بدل دے گا اور انسٹاگرام اور یوٹیوب کے درمیان ایک نئی اور دلچسپ رقابت کا آغاز ہوگا۔
By 
