ہوائی سفر کے دوران یا ایئرپورٹ پر آپ نے پائلٹوں کو سفید یونیفارم اور کندھوں پر پیلے رنگ کی پٹیوں کے ساتھ ضرور دیکھا ہوگا، لیکن کیا آپ جانتے ہیں کہ ان پٹیوں کی تعداد پائلٹ کے عہدے اور ذمہ داریوں کے بارے میں اہم معلومات فراہم کرتی ہے؟
ایوی ایشن کی دنیا میں پائلٹوں کی وردی پر موجود ان پٹیوں کو ایپولیٹسکہا جاتا ہے۔ یہ اصطلاح فرانسیسی زبان کے لفظ Épaule سے نکلی ہے، جس کا مطلب کندھا ہے۔ یہ پٹیاں صرف یونیفارم کی خوبصورتی کے لیے نہیں ہوتیں بلکہ پائلٹ کے عہدے، تربیت اور جہاز میں اس کی ذمہ داری کی نشاندہی بھی کرتی ہیں۔
ایک پٹی، زیرِ تربیت پائلٹ
پائلٹ کے کندھے پر ایک پٹی اس بات کی علامت ہوسکتی ہے کہ وہ کیڈٹ یا ٹرینی پائلٹ ہے اور ابھی تربیت کے مراحل سے گزر رہا ہے۔
2 پٹیاں عموماً سیکنڈ آفیسر یا بعض ایئرلائنز میں فلائٹ انجینیئر کے عہدے کی نشاندہی کرتی ہیں۔ ان کی ذمہ داریاں ایئرلائن اور طیارے کے عملے کے نظام کے مطابق مختلف ہوسکتی ہیں۔
3 پٹیاں، فرسٹ آفیسر یا کو پائلٹ
3 پٹیاں عموماً فرسٹ آفیسر یا کو پائلٹ کے کندھوں پر ہوتی ہیں۔ یہ کیپٹن کے ساتھ پرواز کے فرائض انجام دیتے ہیں اور طیارے کو اڑانے میں اہم کردار ادا کرتے ہیں۔
4 پٹیاں، کیپٹن کا عہدہ
4پٹیاں عموماً طیارے کے کیپٹن کی پہچان ہوتی ہیں۔ اسے پائلٹ اِن کمانڈ بھی کہا جاتا ہے۔ کیپٹن پر طیارے، مسافروں، عملے اور پرواز کے محفوظ آپریشن کی بنیادی ذمہ داری ہوتی ہے۔
یونیفارم کی پٹیوں میں چھپا عہدے کا راز
دنیا کی بیشتر ایئرلائنز میں پائلٹوں کے عہدوں کی شناخت کے لیے پٹیوں کا یہ نظام استعمال کیا جاتا ہے، تاہم مختلف ایئرلائنز کے قواعد اور عہدوں میں کچھ فرق بھی ہوسکتا ہے۔ آئندہ جب آپ کسی پائلٹ کو دیکھیں تو اس کے کندھوں پر موجود پٹیوں کی تعداد سے اندازہ لگا سکیں گے کہ وہ کس عہدے پر کام کر رہا ہے۔
By 
