By پاکستان انٹرنیشنل ایئرلائنز (پی آئی اے) نے ادارے میں شفافیت یقینی بنانے اور مفادات کے ممکنہ ٹکراؤ کی نشاندہی کے لیے تمام ملازمین کو ڈسکلوزر فارم جمع کرانے کی ہدایت کردی ہے۔ انتظامیہ نے ملازمین سے ذاتی تعلقات، خاندانی روابط اور کاروباری مفادات سے متعلق تفصیلات طلب کرلی ہیں۔
ذرائع کے مطابق پی آئی اے انتظامیہ نے ملازمین کو ہدایت کی ہے کہ وہ اپنے قریبی رشتے داروں کے بارے میں مکمل معلومات فراہم کریں۔ ان میں والدین، بہن بھائی، شریک حیات اور دیگر قریبی عزیز شامل ہیں جو قومی ایئرلائن میں ملازمت کر رہے ہیں۔
ملازمین کو ادارے میں کام کرنے والے تھرڈ پارٹی اور آؤٹ سورس اہلکاروں کے ساتھ اپنے تعلقات بھی ظاہر کرنا ہوں گے۔ اس اقدام کا مقصد ادارے کے اندر ایسے روابط کی نشاندہی کرنا ہے جو انتظامی فیصلوں یا کاروباری معاملات پر اثرانداز ہوسکتے ہیں۔
کاروباری روابط بھی انتظامیہ کے سامنے لانا ہوں گے
پی آئی اے انتظامیہ نے ملازمین سے ادارے کے کاروباری شراکت داروں، سپلائرز اور کنٹریکٹرز کے ساتھ تعلقات کی تفصیلات بھی طلب کی ہیں۔
یہ بھی پڑھیں :براہِ راست لندن سفر پھر ممکن، 6 سال بعد بڑی پیش رفت، پی آئی اے فلائٹ کی تاریخ سامنے آ گئی
اس کے علاوہ ملازمین کو اپنے رشتے داروں کے کاروباری مفادات اور ان اداروں کے ساتھ روابط سے بھی آگاہ کرنا ہوگا جو پی آئی اے کے ساتھ کاروبار کرتے ہیں۔
