By طیاروں کی دنیا میں ایک ایسا عالمی ریکارڈ قائم ہوگیا جس نے جدید ہوا بازی کی صلاحیتوں کو نئی بلندیوں پر پہنچا دیا۔ ایئربس کے الٹرا لانگ رینج طیارے اے 350-1000 نے مسلسل 24 گھنٹے اور 24 منٹ پرواز کرکے 23 ہزار 155 کلومیٹر کا فاصلہ طے کرلیا۔
ایئربس نے باضابطہ طور پر تصدیق کی ہے کہ اس غیر معمولی پرواز کو گنیز ورلڈ ریکارڈ میں شامل کرلیا گیا ہے۔ یہ کامیابی کمپنی کے پراجیکٹ سن رائز کا حصہ تھی جس کا مقصد انتہائی طویل فاصلے کی پروازوں کی صلاحیتوں کا عملی مظاہرہ کرنا تھا۔
یہ تاریخی پرواز 27 جولائی 2026 کو آسٹریلیا کے شہر میلبورن سے شروع ہوئی اور فرانس کے شہر ٹولوز میں اختتام پذیر ہوئی۔ طیارے نے پورے سفر کے دوران کہیں بھی لینڈنگ نہیں کی اور مسلسل پرواز کرتے ہوئے ہزاروں کلومیٹر کا فاصلہ عبور کیا۔
یہ بھی پڑھیں :گائیں بھی بن گئیں وی آئی پی، آخر 50 سے زائد گایوں کے لیے پورا طیارہ کیوں بک کیا گیا؟
اس سفر میں طیارے نے بحرالکاہل اور بحرِ اوقیانوس کے اوپر سے پرواز کرتے ہوئے آسٹریلیا، شمالی امریکا اور یورپ کے فضائی راستے عبور کیے۔ پرواز کا دورانیہ اور طے کیا گیا فاصلہ دونوں جدید فضائی ٹیکنالوجی کے لیے ایک اہم سنگ میل قرار دیے جا رہے ہیں۔
ایک ہی پرواز میں دو طلوع اور دو غروبِ آفتاب
اس سفر کا ایک دلچسپ پہلو یہ بھی تھا کہ طیارے میں موجود افراد کو ایک ہی پرواز کے دوران دو مرتبہ سورج غروب ہوتے اور دو مرتبہ طلوع ہوتے دیکھنے کا موقع ملا۔ وقت کے مختلف خطوں اور طویل فضائی سفر کے باعث یہ منفرد منظر ممکن ہوا۔
طیارے میں مجموعی طور پر 13 افراد سوار تھے۔ ان میں ایئربس کے ٹیسٹ پائلٹس اور انجینئرز کے علاوہ کنٹاس کے دو پائلٹ، ایک ڈیزائن انجینئر اور انٹرنیشنل ایئروناٹیکل فیڈریشن کا ایک نمائندہ بھی شامل تھا۔
طویل پرواز کے پیچھے جدید ٹیکنالوجی
اس کامیابی کو محض طویل فاصلے کی پرواز تک محدود نہیں سمجھا جا رہا بلکہ یہ طیارے کی انجینئرنگ، ایندھن کے مؤثر استعمال، آپریشنل منصوبہ بندی اور عملے کی پیشہ ورانہ صلاحیتوں کا بھی امتحان تھا۔
اتنے طویل وقت تک مسلسل پرواز کے لیے طیارے کے مختلف نظاموں کی کارکردگی، ایندھن کی دستیابی اور فضائی راستوں کی منصوبہ بندی بنیادی اہمیت رکھتی ہے۔ اس تجربے نے مستقبل میں انتہائی طویل فاصلے کے فضائی سفر کے امکانات کو بھی نمایاں کیا ہے۔
2027 میں کمرشل پروازوں کا منصوبہ
ایئربس کے مطابق اس طیارے کی پہلی ڈیلیوری اپریل 2027 میں شیڈول ہے جبکہ اسی سال کے اختتام پر اس کے کمرشل آپریشنز شروع کرنے کا منصوبہ ہے۔
یہ بھی پڑھیں ؛بغیر لائسنس 900 پروازیں اڑانے والا جعلی پائلٹ کیسے بے نقاب ہوا ؟ تحقیقات میں حیران کن انکشاف
