فضل الرحمان کا طلبہ کو ڈھال بنا کر قانون کے راستے میں رکاوٹ ڈالنے کی کوشش، مفتی محمود مرکز کی سیکیورٹی انصار السلام کے حوالے

خیبر پختونخوا میں غیرقانونی تجاوزات کے خلاف آپریشن کے خطرات کے پیش نظر جمعیت علمائے اسلام کے سربراہ فضل الرحمان نے طلبہ کو ریاست کے سامنے لا کھڑا کرنے کا پروگرام بنا لیا ہے، غیر قانونی تجاوزات کے خلاف کارروائی کے خطرے کے پیش نظر انصار الاسلام کے رضاکاروں نے رنگ روڈ پر واقع جمعیت علمائے اسلام (ف) کے صوبائی سیکرٹریٹ کا سیکیورٹی کنٹرول سنبھال لیا ہے۔

پشاور کے رنگ روڈ پر قائم جمعیت علمائے اسلام (ف) کے صوبائی سیکرٹریٹ اور مفتی محمود مرکز کو تجاوزات کے خلاف جاری کارروائی کے دوران ممکنہ انہدام کے خطرات کا سامنا ہے، جس پر تنظیم کے ذیلی رضاکار ونگ انصار الاسلام نے سخت حفاظتی اقدامات کرتے ہوئے سیکرٹریٹ کا سیکیورٹی کنٹرول اپنے ہاتھ میں لے لیا ہے۔

یہ بھی پڑھیں:پشاور غیر قانونی تجاوزات کے خلاف آپریشن، بڑے بڑے پیٹرول پمپ پلازے مسمار، غیر قانونی تجاوزات میں شامل مفتی محمود مرکز کی بجلی اور گیس کنکشن کاٹ دیے گئے

اس صورتحال کے پیش نظر جماعت کی اہم صوبائی قیادت بھی مفتی محمود مرکز کے اندر ہی مقیم ہو گئی ہے تاکہ کسی بھی ہنگامی صورتحال سے بروقت نبردآزما ہوا جا سکے اور مرکز کے دفاع کو یقینی بنایا جا سکے۔ رضاکاروں نے پورے مرکز کو گھیرے میں لے کر حفاظتی حصار قائم کر دیا ہے۔

انسدادِ تجاوزات مہم اور انتظامی کارروائیاں

صوبے میں گورنر راج کے نفاذ کے فوری بعد ضلعی انتظامیہ اور متعلقہ اداروں نے پشاور بھر میں غیر قانونی تعمیرات اور تجاوزات کے خلاف ایک سخت اور وسیع مہم کا آغاز کر رکھا ہے۔ اس مہم کے تحت رنگ روڈ پر پہلے ہی متعدد غیر قانونی یا اضافی تعمیرات پر مشتمل عمارات کو مسمار کیا جا چکا ہے۔

حالیہ رپورٹس سے یہ بات سامنے آئی ہے کہ اس انسدادِ تجاوزات کے دائرے میں مفتی محمود مرکز کا اگلا حصہ بھی آ رہا ہے، جس کی وجہ سے سیاسی اور انتظامی حلقوں میں ہلچل مچ گئی ہے اور کشیدگی میں اضافہ ہو رہا ہے۔

اس ساری صورت حال میں مولانا فضل الرحمان نے مدرسے کے طلبہ کو ریاست کے سامنے لاکھڑا کرنے کی کوشش کرتے ہوئے مفتی محمود مرکز کی سیکیورٹی کا انتظام انصار الاسلام مسلح ونگ کے حوالے کر دیا ہے۔

اتوار کو پشاور ڈویلپمنٹ اتھارٹی اور ضلعی انتظامیہ کے عملے نے جمعیت علمائے اسلام کے سیکرٹریٹ کے اردگرد موجود عمارات پر باقاعدہ نشانات (مارکنگ) لگائے۔

اگرچہ اس کارروائی کے دوران خود مرکزی عمارت پر کوئی واضح نشان نہیں لگایا گیا تھا، تاہم اس کے باوجود یہ شدید قیاس آرائیاں کی جا رہی تھیں کہ تجاوزات کی زد میں آنے والے حصوں کو کسی بھی وقت گرایا جا سکتا ہے۔

انہی اطلاعات اور ممکنہ انہدام کے خدشات نے پارٹی قیادت کو مجبور کیا کہ وہ فوری طور پر سیکیورٹی کے انتظامات انصار الاسلام کے رضاکاروں کے سپرد کر دیں تاکہ کسی بھی ناخوشگوار واقعے کو روکا جا سکے۔

مزید پڑھیں:لیبیا سے آئی گرانٹ کہاں غائب ہوئی؟ مفتی محمود مرکز کی تعمیر کے پیچھے فضل الرحمان کی خفیہ فنڈنگ کا کچا چٹھا کھل گیا

واضح رہے کہ صوبائی دارالحکومت میں گورنر راج کے نفاذ کے بعد انتظامیہ کی جانب سے تجاوزات کے خلاف بلا امتیاز کارروائی کا عزم ظاہر کیا گیا ہے۔

دوسری جانب مذہبی جماعت کی طرف سے سیکرٹریٹ کے دفاع کے لیے رضاکاروں کو سامنے لانا اس بات کا غماز ہے کہ فریقین کے درمیان تصادم کا خطرہ موجود ہے۔

جب انتظامی فیصلے اور سیاسی و مذہبی املاک آمنے سامنے آتے ہیں، تو معمولی نوعیت کے تنازعات بھی بڑے محاذ آرائی کا روپ دھار لیتے ہیں۔

اگرچہ انتظامیہ کا مؤقف ہے کہ یہ کارروائیاں قانون کی بالادستی کے لیے ہیں، تاہم سیکرٹریٹ کے گرد حصار اور مرکزی قیادت کی وہاں موجودگی آنے والے دنوں میں سیاسی و انتظامی کشیدگی میں مزید اضافے کا پیش خیمہ ثابت ہو سکتی ہے۔