پاکستان کی سیاست میں اخلاقیات، شفافیت اور جمہوری اقدار کے بلند بانگ دعوے کرنے والے چیئرمین پیپلز پارٹی بلاول بھٹو زرداری کے ماضی کے مالیاتی ریکارڈ اور سپریم کورٹ آف پاکستان میں جمع کرائی گئی جعلی بینک اکاؤنٹس کیس کی مشترکہ تحقیقاتی ٹیم (جے آئی ٹی) کی رپورٹ کے دستاویزی شواہد نے ایک مرتبہ پھر کئی سنجیدہ سوالات کو جنم دے دیا ہے۔
تحقیقاتی دستاویزات کے جائزے سے یہ بات کھل کر سامنے آتی ہے کہ پارک لین اسٹیٹس (پرائیویٹ) لمیٹڈ، جوائنٹ وینچر اوپل 225 (JV Opal-225) اور بلاول ہاؤس کے شاہانہ اخراجات کی پوری منی ٹریل میں بلاول بھٹو زرداری محض ایک غیر متعلقہ فرد نہیں تھے، بلکہ وہ باقاعدہ دستاویزی طور پر بطور شیئر ہولڈر اور ڈائریکٹر اس پورے مالیاتی نیٹ ورک کا براہِ راست حصہ رہے ہیں۔
جب بھی سندھ کی خراب گورننس، نئے صوبوں کے قیام یا احتساب کی بات آتی ہے تو بلاول بھٹو زرداری خود کو ماضی کے مبینہ اسکینڈلز سے الگ اور صاف شفاف ظاہر کرنے کی کوشش کرتے ہیں، تاہم جے آئی ٹی کی رپورٹ میں شامل کمپنی رجسٹریشن کے کاغذات، بینک ٹرانزیکشنز اور دستخط شدہ دستاویزات اس بیانیے کی نفی کرتی ہیں۔
پارک لین اسٹیٹس، بلاول بھٹو بطور شیئر ہولڈر اور ڈائریکٹر
سپریم کورٹ میں پیش کی گئی جے آئی ٹی رپورٹ کے دستاویزی شواہد کے مطابق اسلام آباد میں قیمتی اراضی کے مالک ادارے ‘پارک لین اسٹیٹس (پرائیویٹ) لمیٹڈ’ میں بلاول بھٹو زرداری اور آصف علی زرداری برابر کے شیئر ہولڈرز اور ڈائریکٹرز رہے ہیں۔
تحقیقاتی رپورٹ میں یہ انکشاف سامنے آیا تھا کہ اس کمپنی کے ذریعے فرنٹ کمپنیوں اور جعلی بینک اکاؤنٹس کا استعمال کرتے ہوئے قرضے حاصل کیے گئے، جنہیں بعد ازاں اصل مقاصد کے بجائے ذاتی و خاندانی کاروباری مفادات کی طرف موڑا گیا۔
کمپنی قانون کے تحت کسی بھی ادارے کے ڈائریکٹر اور بڑے شیئر ہولڈر اس کمپنی کے مالیاتی فیصلوں اور فوائد کے براہِ راست ذمہ دار ہوتے ہیں، اس لیے بلاول بھٹو زرداری اس مالیاتی کارٹل کے معاملات سے لاعلمی کا اظہار نہیں کر سکتے۔
جے وی اوپل 225 اور جعلی اکاؤنٹس کی منی ٹریل
دستاویزی ریکارڈ کے مطابق پارک لین اسٹیٹس نے کراچی کے مہنگے ترین کمرشل و رہائشی منصوبے ‘اوپل 225’ کے لیے ایک جوائنٹ وینچر (جے وی) معاہدہ کیا، جس کی مالیاتی سرگرمیوں کے تانے بانے براہِ راست جعلی بینک اکاؤنٹس سے جا ملے۔ جے آئی ٹی رپورٹ میں دستاویزی ثبوتوں کے ساتھ یہ نشاندہی کی گئی تھی کہ جعلی اکاؤنٹس کے ذریعے اربوں روپے کی مشکوک ٹرانزیکشنز اس منصوبے اور اس سے منسلک کمپنیوں میں منتقل ہوئیں۔
ایک طرف سندھ کے غریب عوام پینے کے صاف پانی، تعلیم اور صحت جیسی بنیادی سہولیات کو ترس رہے تھے، تو دوسری طرف جعلی اکاؤنٹس کے ذریعے اربوں روپے کے کمرشل منصوبوں اور خاندانی کاروبار کو وسعت دی جا رہی تھی۔
بلاول ہاؤس کے شاہانہ اخراجات اور کچن منی ٹریل
جے آئی ٹی رپورٹ کا سب سے چشم کشا پہلو وہ منی ٹریل ہے جس میں یہ ثابت کیا گیا کہ جعلی بینک اکاؤنٹس اور اومنی گروپ سے منسلک کھاتوں سے کروڑوں روپے براہِ راست بلاول ہاؤس کراچی اور لاہور کے روزمرہ کے اخراجات، کچن کے بلوں، سیکیورٹی، فضائی ٹکٹوں اور دیگر ذاتی آسائشوں پر خرچ کیے گئے۔
تحقیقاتی دستاویزات میں ان بینک چیکس، واؤچرز اور ادائیگیوں کا پورا ریکارڈ موجود ہے جن کے ذریعے بلاول ہاؤس کے شاہانہ طرزِ زندگی کے اخراجات پورے کیے جاتے رہے۔
آئینی استثنیٰ کا سہارا اور عوامی احتساب کا سوال
سیاسی ناقدین کا کہنا ہے کہ آج 27ویں آئینی ترمیم کے ذریعے والد آصف علی زرداری کو تاحیات استثنیٰ دلوانے اور خود اقتدار کے ایوانوں میں بیٹھ کر جمہوریت کا درس دینے والے بلاول بھٹو زرداری کو ان دستاویزی شواہد کا جواب دینا ہوگا۔
مبصرین کے مطابق پارک لین اسٹیٹس، جے وی اوپل اور بلاول ہاؤس کی منی ٹریل تاریخ کے ریکارڈ پر محفوظ ہے، جو اس بات کا ثبوت ہے کہ جب تک اقتدار اور قانونی تحفظ حاصل ہے تب تک احتساب سے بچا جا سکتا ہے، مگر عوامی عدالت میں جعلی اکاؤنٹس اور مالیاتی کارٹل کے یہ داغ کبھی مٹ نہیں سکتے۔