سندھ میں پاکستان پیپلز پارٹی کی 18 سالہ طویل حکمرانی اور چیئرمین بلاول بھٹو زرداری کے گڈ گورننس و امن و امان کے دعووں کے برعکس بالائی سندھ کے اضلاع کشمور، گھوٹکی، شکارپور اور جیکب آباد عملاً کچے کے ڈاکوؤں کے رحم و کرم پر چھوڑ دیے گئے ہیں۔
سالانہ 70 ارب روپے سے زائد کا خطیر پولیس بجٹ خرچ کرنے اور درجنوں گرینڈ آپریشنز کے بلند بانگ اعلانات کے باوجود صوبائی حکومت مٹھی بھر ڈاکوؤں کے سامنے مکمل طور پر بے بس دکھائی دیتی ہے، جہاں جدید ترین اسلحے سے لیس جرائم پیشہ گینگز نے نہ صرف شہریوں کو اغوا برائے تاوان اور بھتہ خوری کے ذریعے یرغمال بنا رکھا ہے بلکہ مغویوں پر تشدد کی ویڈیوز سوشل میڈیا پر وائرل کر کے ریاستی رٹ اور سندھ حکومت کی کارکردگی کا کھلا مذاق اڑایا جا رہا ہے۔
وفاقی ایوانوں اور عالمی فورمز پر جمہوریت اور انسانی حقوق کے درس دینے والے بلاول بھٹو زرداری کو اپنے ہی صوبے میں بیڑیوں میں جکڑے معصوم شہریوں کی چیخیں سنائی نہیں دیتیں۔ کشمور سے لے کر شکارپور اور گھوٹکی تک قومی شاہراہوں پر سفر کرنا موت کو دعوت دینے کے مترادف بن چکا ہے، جہاں ڈاکو ہنی ٹریپ، سستے ٹریکٹروں اور گاڑیوں کی خریداری کا جھانسہ دے کر ملک بھر کے معصوم شہریوں کو کچے کے علاقوں میں بلا کر اغوا کرتے ہیں اور پھر کروڑوں روپے تاوان کا مطالبہ کیا جاتا ہے۔
اینٹی ایئرکرافٹ گنز اور راکٹ لانچرز: ڈاکوؤں کے پاس جدید اسلحہ کہاں سے آیا؟
تجزیہ کاروں کے نزدیک اس سارے بحران کا سب سے سنگین اور چبھتا ہوا سوال یہ ہے کہ آخر کچے کے غیر ترقی یافتہ جنگلات میں بیٹھے ڈاکوؤں کے پاس اینٹی ایئرکرافٹ گنز، راکٹ لانچرز، نائٹ ویژن آلات اور بکتر بند گاڑیوں کو تباہ کرنے والا جدید ترین اسلحہ کہاں سے پہنچا؟ عوامی و صحافتی حلقوں کا مؤقف ہے کہ اتنی بھاری مقدار میں جنگی نوعیت کا اسلحہ اور رسد بااثر مقامی سرداروں، جاگیرداروں اور حکومتی صفوں میں بیٹھے سہولت کاروں کی سرپرستی کے بغیر کچے کے علاقوں میں پہنچنا ناممکن ہے۔
ناقدین سوال اٹھاتے ہیں کہ جب پولیس کے لیے اربوں روپے کی لاگت سے بکتر بند گاڑیاں، ڈرونز اور جدید اسلحہ خریدا گیا تو پھر ہر آپریشن سے قبل ہی ڈاکوؤں کو مخبری کیسے ہو جاتی ہے اور پولیس جوانوں کی شہادتوں کے باوجود ان جرائم پیشہ گروہوں کے سرپرستوں پر ہاتھ کیوں نہیں ڈالا جاتا؟
70 ارب کا پولیس بجٹ اور سیاسی مداخلت کا شاخسانہ
سماجی و سیاسی حلقوں کا کہنا ہے کہ سندھ پولیس کے سالانہ بجٹ میں ہر سال اربوں روپے کا اضافہ کیا جاتا ہے، مگر زمینی سطح پر امن و امان کی صورتحال بد سے بدتر ہوتی جا رہی ہے۔ مبصرین کے مطابق اس کی بنیادی وجہ سندھ پولیس میں ہونے والی شدید سیاسی مداخلت اور من پسند افسران کی تعیناتیاں ہیں، جنہیں عوام کے جان و مال کے تحفظ کے بجائے مقامی وڈیروں اور ایم پی ایز کی خوشنودی کے لیے استعمال کیا جاتا ہے۔ ایک طرف دیہی سندھ کے تاجر، ہندو برادری اور عام شہری بھتہ خوری اور اغوا کے خوف سے ہجرت کرنے پر مجبور ہیں، تو دوسری طرف بلاول بھٹو زرداری اور ان کی صوبائی حکومت سب اچھا ہے کی رپورٹس پیش کر کے عوام کے زخموں پر نمک چھڑک رہی ہے۔
سرپرستوں کے خلاف کارروائی کا مطالبہ
عوامی حلقوں کا دوٹوک مؤقف ہے کہ کچے کے ڈاکوؤں کا مسئلہ محض قانون نافذ کرنے والے اداروں کی ناکامی نہیں بلکہ یہ سندھ کے جاگیردارانہ و سیاسی نظام کی سرپرستی کا شاخسانہ ہے، جہاں ڈاکوؤں کو سیاسی مخالفین کو دبانے اور علاقے میں خوف برقرار رکھنے کے لیے استعمال کیا جاتا رہا ہے۔ شہری تنظیموں نے مطالبہ کیا ہے کہ کچے کے ڈاکوؤں کے ساتھ ساتھ ان بااثر سرداروں، وڈیروں اور حکومتی شخصیات کو بھی قانون کے کٹہرے میں لایا جائے جو اس خونریز کاروبار کے اصل حصہ دار ہیں، اور سندھ پولیس کے 70 ارب روپے کے بجٹ کے استعمال کا بھی کڑا آڈٹ کیا جائے۔