کیا آپ کو بھی یوٹیوب پہلے سے مختلف محسوس ہو رہا ہے؟ وجہ جانئے

اگر گزشتہ چند روز کے دوران آپ کو یوٹیوب کچھ مختلف محسوس ہوا ہے تو یہ آپ کا وہم نہیں، بلکہ حقیقت میں یوٹیوب نے اپنے ویڈیو پلیئر کو اپ ڈیٹ کر دیا ہے۔

کمپنی کے مطابق اس ویڈیو پلیئر کو پہلے سے زیادہ صاف ستھرا اور بہتر بنایا جا رہا ہے تاکہ صارفین کو زیادہ پرکشش تجربہ فراہم کیا جا سکے۔

یوٹیوب نے بتایا ہے کہ نئے ویڈیو پلیئر میں کنٹرولز کو اپ ڈیٹ کیا گیا ہے اور نئے آئیکونز بھی شامل کیے گئے ہیں، جس سے ویڈیوز دیکھنے کا تجربہ مزید دلچسپ ہوگا۔ کمپنی کی جانب سے ان تبدیلیوں کی آزمائش 2025 کے آغاز سے کی جا رہی تھی، اور اب انہیں باضابطہ طور پر متعارف کرایا گیا ہے۔

یوٹیوب کی جانب سے جاری ایک اسکرین شاٹ میں نئے ویڈیو پلیئر کا ڈیزائن دکھایا گیا ہے، جس میں راؤنڈ آن اسکرین بٹن نمایاں طور پر دیکھے جا سکتے ہیں۔ کمپنی کے مطابق یہ نیا ویڈیو پلیئر موبائل، ویب اور ٹی وی ڈیوائسز پر دستیاب ہوگا۔

مزید برآں، یوٹیوب کی جانب سے کچھ دیگر اپ ڈیٹس بھی متعارف کرائی جا رہی ہیں۔ کمپنی نے بتایا ہے کہ کمنٹس کے جوابات کے لیے ایک نیا اسٹرکچرڈ سسٹم شامل کیا جا رہا ہے۔ اسی طرح، کچھ ویڈیوز میں جب صارفین لائیک بٹن پر کلک کریں گے تو ایک ڈائنامک انیمیشن بھی ظاہر ہوگی۔

یہ بھی پڑھیں: گیمبلنگ ایپس کیس میں ڈکی بھائی کی ضمانت منسوخ، 3 لاکھ ڈالر برآمد، دیگر یوٹیوبر بھی ’ریڈار ‘ پر آ گئے، فہرست جاری