امریکہ میں شدید برفباری،نظام زندگی درہم برہم، سینکڑوں پروازیں منسوخ

امریکا کے مختلف حصے شدید بارشوں اور برفباری کی لپیٹ میں آ گئے ہیں جس کے باعث معمولاتِ زندگی بری طرح متاثر ہو کر رہ گئے ہیں۔شدید موسمی حالات کے نتیجے میں سڑکوں کی بندش، پروازوں کی منسوخی اور بجلی کی فراہمی میں تعطل نے شہریوں کو شدید مشکلات سے دوچار کر دیا ہے جبکہ امدادی ادارے ہنگامی صورتحال سے نمٹنے کے لیے پوری طرح متحرک ہیں۔

خبر ایجنسی کے مطابق ملک بھر میں 14 ہزار 400 سے زائد پروازیں یا تو منسوخ کر دی گئی ہیں یا تاخیر کا شکار ہیں جس سے لاکھوں مسافروں کے سفری منصوبے متاثر ہوئے ہیں۔

شدید برفباری کے باعث نیو جرسی، نیویارک، شکاگو اور بوسٹن سمیت کئی بڑے شہروں میں نظامِ نقل و حمل شدید متاثر ہے۔سڑکوں پر برف کی موٹی تہیں جم جانے کے باعث ٹریفک کی روانی معطل ہو گئی ہے اور متعدد شاہراہیں بند کر دی گئی ہیں۔

یہ بھی پڑھیں :امریکا میں شدید برفباری، فضائی سفر بری طرح متاثر، ایک ہزار سے زائد پروازیں منسوخ

حکام کے مطابق نیو یارک اور نیو جرسی میں صورتحال کی سنگینی کے پیش نظر ایمرجنسی نافذ کر دی گئی ہے جبکہ شہریوں کو غیر ضروری سفر سے گریز کی ہدایات جاری کی گئی ہیں۔

Saturday Morning Snow Ops Update:

Yes, the white stuff arrived. Snow melts and refreezes. Plows and salt spreaders will be out as long as needed to address icy conditions.

While we take care of streets, property owners are responsible for clearing the sidewalks abutting their… pic.twitter.com/HwWQPHBmEF

— NYC Sanitation (@NYCSanitation) December 27, 2025

دوسری جانب ریاست کیلیفورنیا میں موسلا دھار بارشوں کے باعث سیلابی صورتحال پیدا ہو گئی ہے، جس سے ٹریفک کا نظام درہم برہم ہو گیا اور سیکڑوں افراد اپنے گھروں سے بے گھر ہونے پر مجبور ہو گئے ہیں۔

ریاست بھر میں تقریباً 50 ہزار افراد بجلی سے محروم ہیں، جب کہ لاس اینجلس کاؤنٹی کے متعددعلاقوں میں کئی کئی فٹ پانی جمع ہو چکا ہے،سیلابی ریلوں کے باعث نشیبی علاقے زیرِ آب آ گئے ہیں اور اہم سڑکیں بند ہونے سے امدادی سرگرمیوں میں بھی مشکلات پیش آ رہی ہیں۔

ریسکیو اور امدادی ٹیمیں متاثرہ علاقوں میں پھنسے افراد کو محفوظ مقامات پر منتقل کرنے اور نقصانات کا جائزہ لینے میں مصروف ہیں۔
حکام کا کہنا ہے کہ موسمی حالات مزید خراب ہو سکتے ہیں جس کے پیش نظر شہریوں کو احتیاطی تدابیر اختیار کرنے اور سرکاری ہدایات پر عمل کرنے کی تلقین کی گئی ہے۔