کیا حکومت دس روپے کا نوٹ ختم کرنے والی ہے؟ اہم خبر سامنے آگئی

دس روپے کے بینک نوٹ کے مستقبل سے متعلق ایک اہم پیش رفت سامنے آئی ہے جس کے تحت وفاقی کابینہ نے اس معاملے کا تفصیلی جائزہ لینے کے لیے خصوصی کمیٹی تشکیل دے دی ہے۔

اس کمیٹی کی سربراہی وزیرِ خزانہ کریں گے اور اس کا مقصد یہ طے کرنا ہے کہ آیا دس روپے کا بینک نوٹ برقرار رکھا جائے یا اسے ختم کر کے متبادل کے طور پر سکے کے استعمال کو فروغ دیا جائے۔

ذرائع کے مطابق وفاقی کابینہ کی جانب سے قائم کی گئی کمیٹی کو واضح ہدایات دی گئی ہیں کہ وہ دس روپے کے بینک نوٹ کی پیداواری لاگت کا جامع تجزیہ کرے۔ اس کے ساتھ ساتھ کمیٹی دس روپے کے سکے کی تیاری، پائیداری اور مجموعی لاگت کا بھی موازنہ کرے گی تاکہ یہ جانچا جا سکے کہ کون سا ذریعہ زیادہ مؤثر، دیرپا اور کم خرچ ثابت ہوتا ہے۔

حکام کا کہنا ہے کہ اس جائزے کا بنیادی مقصد قومی خزانے پر پڑنے والے مالی بوجھ کو کم کرنا اور کرنسی کے نظام کو زیادہ مؤثر بنانا ہے۔ دس روپے کے بینک نوٹ کی کم مدتِ استعمال اور بار بار چھپائی کے باعث اخراجات میں اضافے کے پہلوؤں پر بھی غور کیا جائے گا، جبکہ سکے کی طویل عمر اور کم دیکھ بھال کے تقاضوں کا بھی جائزہ لیا جائے گا۔

یہ بھی پڑھیں: باغ جناح کراچی میں 600 سے 700 تحریک انصاف ورکر ز موجود،اعلی پولیس ذرائع کی آزاد ڈیجیٹل سے گفتگو

ذرائع کے مطابق کمیٹی اپنی تفصیلی سفارشات مرتب کرنے کے بعد وفاقی کابینہ کو پیش کرے گی۔ انہی سفارشات کی روشنی میں دس روپے کے بینک نوٹ کے حوالے سے حتمی فیصلہ کیا جائے گا کہ آیا اسے مستقبل میں جاری رکھا جائے یا مرحلہ وار ختم کر دیا جائے۔

فی الحال حکومت کی جانب سے دس روپے کے نوٹ کے خاتمے کا کوئی حتمی اعلان نہیں کیا گیا، تاہم اس پیش رفت کو کرنسی پالیسی میں ممکنہ تبدیلی کی جانب ایک اہم قدم قرار دیا جا رہا ہے۔