وزیراعظم پاکستان شہباز شریف ورلڈ اکنامک فورم کے 56ویں سالانہ اجلاس میں شرکت کے لیے سوئٹزرلینڈ پہنچ گئے ہیں جہاں وہ عالمی معیشت، سرمایہ کاری، علاقائی تعاون اور پائیدار ترقی سے متعلق اجلاس میں شرکت کریں گے۔
وزیراعظم کی آمد پر زیورخ کے بین الاقوامی ہوائی اڈے پر اقوام متحدہ میں پاکستان کے مستقل نمائندے محمد بلال، سوئٹزرلینڈ میں پاکستان کے سفیر مرغوب سلیم اور پاکستانی سفارتی عملے کے سینئر حکام نے ان کا پرتپاک استقبال کیا۔
اس اعلیٰ سطحی دورے میں وزیراعظم کے ہمراہ نائب وزیراعظم اور وزیر خارجہ اسحاق ڈار، وفاقی وزیر اقتصادی امور احد چیمہ، وفاقی وزیر خزانہ و محصولات محمد اورنگزیب، وفاقی وزیر اطلاعات و نشریات عطااللہ تارڑ اور وزیراعظم کے معاون خصوصی طارق فاطمی بھی شامل ہیں[وفد کی یہ جامع نمائندگی اس امر کی عکاس ہے کہ پاکستان عالمی فورمز پر اپنی معاشی ترجیحات، سفارتی اہداف اور سرمایہ کاری کے مواقع کو بھرپور انداز میں اجاگر کرنا چاہتا ہے۔
ورلڈ اکنامک فورم کے 56ویں سالانہ اجلاس کے دوران وزیراعظم شہباز شریف مختلف اعلیٰ سطحی سیشنز میں شرکت کریں گے، جہاں عالمی رہنما، پالیسی ساز، سرمایہ کار اور کاروباری شخصیات دنیا کو درپیش معاشی چیلنجز اور مستقبل کے مواقع پر تبادلہ خیال کریں گے[اجلاس کے موقع پر وزیراعظم کی متعدد عالمی رہنماؤں سے دو طرفہ ملاقاتیں بھی متوقع ہیں، جن میں تجارت، سرمایہ کاری، توانائی، موسمیاتی تبدیلی اور علاقائی استحکام جیسے اہم موضوعات زیر بحث آئیں گے۔
وزیراعظم پاکستان اس اجلاس کے دوران پاکستان کی میزبانی اور ورلڈ اکنامک فورم کی شراکت داری سے منعقد ہونے والی بزنس راؤنڈ ٹیبل میں بھی شرکت کریں گے، جہاں بین الاقوامی سرمایہ کاروں کو پاکستان میں سرمایہ کاری کے مواقع، پبلک پرائیویٹ پارٹنرشپس اور نجی شعبے کے کردار سے آگاہ کیا جائے گا۔
وزیراعظم شہباز شریف اجلاس کے دوران پاکستان میں معاشی استحکام کے لیے جاری اصلاحات، بہتر ہوتے ہوئے معاشی اشاریوں، مالی نظم و ضبط، برآمدات میں اضافے اور کاروبار دوست پالیسیوں پر روشنی ڈالیں گے۔
By 
