پی ایس ایل 11 کا فائنل، ٹاس ہوگیا،حیدر آباد کنگز مین پہلے بیٹنگ کرے گی

پی ایس ایل گیارہ کا فائنل قذافی سٹیڈیم لاہور میں کھیلا جارہا ہے،پشاور زلمی نے ٹاس جیت کر حیدرآباد کنگز مین کے خلاف پہلے  فیلڈنگ کرنے کا فیصلہ کیا ہے ، پشاور زلمی کے کپتان بابر اعظم نے جیت کا عزم ظاہر کرتے ہوئے کہا ہے کہ وہ فائنل جیتنے کی بھر پور کوشش کریں گے ۔

قذافی اسٹیڈیم لاہور میں پی ایس ایل گیارہ کے فائنل سے قبل شاندار اور رنگا رنگ اختتامی تقریب کا انعقاد کیا گیا، جہاں اسٹیڈیم مکمل طور پر ہاؤس فل رہا اور شائقین کی بڑی تعداد نے بھرپور جوش و خروش کا مظاہرہ کیا۔

ٹاس سے قبل ہونے والی اس تقریب میں ملک کے نامور گلوکاروں نے اپنی شاندار پرفارمنس سے سماں باندھ دیا عاطف اسلم، علی عظمت، عارف لوہار، آئمہ بیگ اور صابری سسٹرز نے اسٹیج پر اپنی منفرد آوازوں اور انداز کے ذریعے شائقین کو خوب محظوظ کیا۔ ہر فنکار کی پرفارمنس پر اسٹیڈیم تالیاں اور نعروں سے گونجتا رہا اور ماحول مکمل طور پر موسیقی اور جوش سے بھر گیا۔

یہ بھی پڑھیں :پی ایس ایل 11 کی رنگا رنگ اختتامی تقریب،عارف لوہا ر کی پرفارمنس پر شائقین جھوم اٹھے

تقریب کے بعد اب کرکٹ کے سب سے بڑے مقابلے کا آغاز ہونے جا رہا ہے، جہاں فائنل میں حیدرآباد کنگزمین اور پشاور زلمی آمنے سامنے ہوں گی۔ حیدرآباد کنگزمین اپنی پہلی ہی شرکت میں ٹائٹل جیتنے کے لیے پرعزم ہیں جبکہ پشاور زلمی، جو کہ سابق چیمپئن ہیں، ایک بار پھر ٹرافی اپنے نام کرنے کے لیے میدان میں اتری ہے۔

پشاور زلمی کے کپتان بابر اعظم نے کہا کہ لاہور میں ہمیشہ ان کی ٹیم کو شائقین کی بھرپور سپورٹ ملتی ہے اور وہ اپنے منصوبے پر عمل کرتے ہوئے بہترین کارکردگی دکھانے کی کوشش کریں گے۔

دوسری جانب حیدرآباد کنگزمین کے کپتان مارنوس لبوشین نے کہا کہ وہ   یہاں کھیل کر بہت اچھا محسوس کر رہے ہیں، پچ اچھی لگ رہی ہے اور ٹیم میں کوئی تبدیلی نہیں کی گئی، جس سے ان کا اعتماد مزید مضبوط ہوا ہے۔