5 ہزار روپے کا نوٹ اصلی ہے یا جعلی؟ پہچان کا آسان طریقہ

جعلی کرنسی نوٹوں کے بڑھتے خدشات کے پیش نظر اسٹیٹ بینک آف پاکستان نے 5 ہزار روپے کے نوٹ میں موجود اہم سیکیورٹی فیچرز کی تفصیلات جاری کر دی ہیں، جن کی مدد سے شہری اصل اور جعلی نوٹ میں فرق آسانی سے جانچ سکتے ہیں۔

مرکزی بینک کے مطابق 5 ہزار روپے کا کرنسی نوٹ ملک بھر میں قانونی حیثیت رکھتا ہے اور اس میں متعدد جدید حفاظتی خصوصیات شامل کی گئی ہیں تاکہ جعلسازی کی روک تھام کی جا سکے اور عوام کو نوٹ کی اصل شناخت سے آگاہ رکھا جا سکے۔

واٹر مارک سے نوٹ کی پہچان

اسٹیٹ بینک کے مطابق اصل 5 ہزار روپے کے نوٹ میں قائداعظم محمد علی جناح کی قومی لباس میں تصویر والا واٹر مارک موجود ہوتا ہے۔ یہ واٹر مارک نوٹ کو روشنی کے سامنے رکھنے پر واضح دکھائی دیتا ہے۔

اسی حصے میں الیکٹرو ٹائپ واٹر مارک بھی شامل ہوتا ہے، جس میں ’’5000‘‘ کا ہندسہ نظر آتا ہے۔ جعلی نوٹوں میں عموماً یہ نشان واضح، درست یا اصل معیار کے مطابق نہیں ہوتا، اس لیے نوٹ وصول کرتے وقت اس فیچر کو ضرور چیک کرنا چاہیے۔

سیکیورٹی دھاگہ اہم حفاظتی فیچر

5 ہزار روپے کے اصل نوٹ میں جزوی طور پر نمایاں سیکیورٹی دھاگہ بھی شامل کیا گیا ہے۔ اس دھاگے پر ’’5000‘‘ تحریر ہوتا ہے، جو نوٹ کی شناخت میں اہم کردار ادا کرتا ہے۔

روشنی میں دیکھنے پر یہ دھاگہ دھاتی پٹی کی شکل اختیار کر لیتا ہے، جبکہ الٹرا وائلٹ روشنی میں اس کے رنگ تبدیل ہوتے ہیں۔ اسٹیٹ بینک کے مطابق یہ فیچر جعلی نوٹوں کی نشاندہی میں مددگار ثابت ہو سکتا ہے۔

یہ بھی پڑھیں: ملتان میں بڑی کارروائی ، بینک کا نمائندہ بن کر شہریوں سے مالی فراڈ کرنیوالے 5 ملزم گرفتار

سی تھرو رجسٹر کی مدد سے تصدیق

اصل نوٹ میں ’’سی تھرو رجسٹر‘‘ فیچر بھی موجود ہوتا ہے۔ اس فیچر کے تحت نوٹ کے دونوں اطراف پر بنے مخصوص ڈیزائن روشنی میں دیکھنے پر مکمل طور پر ایک دوسرے سے مل جاتے ہیں۔

اگر یہ ڈیزائن درست انداز میں ایک دوسرے سے نہ ملیں یا شکل مکمل نہ بنے تو نوٹ مشکوک ہو سکتا ہے۔ اسی لیے اسٹیٹ بینک نے شہریوں کو ہدایت کی ہے کہ وہ نوٹ وصول کرتے وقت اس فیچر کو بھی لازمی چیک کریں۔

تعلیمی ویڈیو بھی جاری

اسٹیٹ بینک نے عوامی آگاہی کے لیے ایک تعلیمی ویڈیو بھی جاری کی ہے، جس میں 5 ہزار روپے کے نوٹ کی اصل شناخت کے طریقے بتائے گئے ہیں۔ ویڈیو کا مقصد شہریوں کو یہ سمجھانا ہے کہ وہ روزمرہ لین دین کے دوران جعلی نوٹوں سے کیسے بچ سکتے ہیں۔

شہریوں کے لیے اہم ہدایت

مرکزی بینک نے شہریوں کو مشورہ دیا ہے کہ وہ 5 ہزار روپے کا نوٹ وصول کرتے وقت واٹر مارک، سیکیورٹی دھاگہ اور سی تھرو رجسٹر سمیت تمام نمایاں حفاظتی علامات کو ضرور چیک کریں۔

اسٹیٹ بینک کا کہنا ہے کہ عوام کی آگاہی جعلی نوٹوں کی روک تھام میں اہم کردار ادا کر سکتی ہے، اس لیے شہری کسی بھی مشکوک نوٹ کو قبول کرنے سے پہلے اس کی اچھی طرح تصدیق کریں۔

یہ بھی پڑھیں: اسٹیٹ بینک نے بینکوں کے اوقاتِ کار کے حوالے سے اہم اعلان کر دیا