شدید گرمی سے پریشان عوام کے لیے بڑی خبر

نیشنل ڈیزاسٹر مینجمنٹ اتھارٹی نے ملک کے بالائی علاقوں میں شدید بارش، فلیش سیلاب اور لینڈ سلائیڈز کے خدشات کے پیش نظر آج سے 15 جون تک الرٹ جاری کر دیا ہے۔

این ڈی ایم اے کے مطابق گلگت بلتستان، خیبر پختونخوا اور آزاد کشمیر میں تیز ہواؤں اور گرج چمک کے ساتھ بارش کا امکان ہے۔ بارش کے باعث مقامی سطح پر فلیش سیلاب پیدا ہونے کے ساتھ ساتھ دریاوں اور نالوں میں بھی پانی بڑھنے کا خدشہ ہے۔

ایجنسی نے خبردار کیا ہے کہ چترال، شانگلہ، کوہستان، بٹگرام اور مانسہرہ کے پہاڑی علاقوں میں فلیش سیلاب کا خطرہ ہے۔ اسی طرح آزاد کشمیر کے مظفرآباد، نیلم ویلی، باغ اور راولاکوٹ میں بھی شدید بارش کے نتیجے میں سیلاب کی پیش گوئی کی گئی ہے۔

یہ بھی پڑھیں: ملک بھر میں آئندہ 24 گھنٹے موسم کیسا رہے گا ؟ محکمہ موسمیات نے پیش گوئی کر دی

گلگت بلتستان کے اضلاع غذر، دیامر، گلگت، تانگیر، دارل اور گپیس یاسین میں دریاوں اور نالوں میں پانی بڑھنے کا خطرہ ہے۔ این ڈی ایم اے نے گلگت بلتستان اور ملحقہ پہاڑی علاقوں میں 12 سے 15 جون کے درمیان لینڈ سلائیڈز کے امکانات کی بھی وارننگ جاری کی ہے۔

الرٹ کے مطابق شدید بارش اور ممکنہ لینڈ سلائیڈز کی وجہ سے قراقرم ہائی وے اور جگلوٹ-سکردو روڈ کے مختلف حصوں میں عارضی طور پر ٹریفک بندش اور سفر میں مشکلات پیدا ہونے کا خدشہ ہے۔

شہریوں کو مشورہ دیا گیا ہے کہ دریاوں، نالوں اور پانی کے خطرے والے کم زمین والے علاقوں میں غیر ضروری قیام سے گریز کریں۔ پہاڑی علاقوں کا دورہ کرنے والے سیاحوں کو بھی مشورہ دیا گیا ہے کہ غیر ضروری سفر مؤخر کریں اور سفر سے پہلے موسمی حالات اور سڑکوں کی صورتحال سے باخبر رہیں

یہ بھی پڑھیں: سندھ ، پنجاب، کشمیر ، کے پی کے ، محکمہ موسمیات نے خبردار کردیا