پاکستان نے بھارتی طیاروں کے لیے اپنی فضائی حدود کی بندش میں ایک بار پھر توسیع کر دی ہے جس کے تحت بھارتی رجسٹرڈ، بھارتی ملکیت اور بھارتی آپریٹرز کے زیر استعمال تمام طیارے 24 جولائی تک پاکستانی فضائی حدود استعمال نہیں کر سکیں گے۔ اس حوالے سے پاکستان سول ایوی ایشن اتھارٹی نے نیا نوٹم جاری کر دیا ہے۔
نوٹم کے مطابق بھارتی ایئرلائنز اور آپریٹرز کی تمام سول اور عسکری پروازوں پر پاکستانی فضائی حدود کے استعمال کی پابندی برقرار رہے گی۔ اس فیصلے کا اطلاق بھارتی رجسٹرڈ طیاروں کے علاوہ ان ہوائی جہازوں پر بھی ہوگا جو بھارتی ملکیت میں ہیں یا لیز پر لیے گئے ہیں۔
پاکستان سول ایوی ایشن اتھارٹی کی جانب سے جاری نوٹم میں کہا گیا ہے کہ یہ پابندی آج شام 5 بج کر 50 منٹ سے نافذ العمل ہوگی اور 24 جولائی کی صبح 4 بج کر 59 منٹ تک برقرار رہے گی۔ اس دوران کوئی بھی بھارتی سول یا فوجی طیارہ پاکستانی فضائی حدود سے گزرنے کی اجازت حاصل نہیں کر سکے گا۔
حکام کے مطابق فضائی حدود کی بندش سے متعلق فیصلہ موجودہ پالیسی کے تسلسل میں کیا گیا ہے۔ پاکستان پہلے ہی بھارتی پروازوں کے لیے اپنی فضائی حدود بند کر چکا ہے اور اب اس پابندی کی مدت میں مزید توسیع کر دی گئی ہے۔
یاد رہے کہ پاکستان نے 23 اپریل 2025 سے بھارتی طیاروں کے لیے اپنی فضائی حدود بند کر رکھی ہیں۔ اس فیصلے کے باعث بھارتی ایئرلائنز کو اپنے پروازی راستوں میں تبدیلیاں کرنا پڑی ہیں، جس سے ان کے آپریشنل اخراجات میں اضافہ ہوا ہے۔ طویل فاصلے اختیار کرنے کے باعث بھارتی فضائی کمپنیوں کو مالی دباؤ کا سامنا بھی کرنا پڑا ہے۔
تازہ نوٹم کے اجرا کے بعد بھارتی پروازوں پر عائد پابندی مزید ایک ماہ سے زائد عرصے تک برقرار رہے گی، جبکہ پاکستانی فضائی حدود بدستور بھارتی سول اور عسکری طیاروں کے لیے بند رہیں گی۔
By 
