صدرِ مملکت آصف علی زرداری، وزیراعظم محمد شہباز شریف اور وفاق وزیر داخلہ محسن نقوی نے کراچی میں دہشت گردوں کا بزدلانہ حملہ ناکام بناتے ہوئے جامِ شہادت نوش کرنے والے سندھ رینجرز کے بہادر اہلکاروں کو زبردست خراجِ عقیدت پیش کیا ہے۔
قومی قیادت نے دوٹوک الفاظ میں واضح کیا ہے کہ سیکیورٹی فورسز نے 3 دہشتگردوں کو ہلاک اور 1 کو زندہ گرفتار کر کے ‘فتنہ الہندوستان’ کے جارحانہ اور ناپاک عزائم کو خاک میں ملا دیا ہے اور پوری قوم اپنے ان ہیروز کی لازوال قربانیوں کو کبھی فراموش نہیں کرے گی۔
بیرونی سرپرستی میں سرگرم عناصر ناکام ہوں گے، صدر آصف زرداری
صدرِ مملکت آصف علی زرداری نے رینجرز شہدا کی قربانی کو سراہتے ہوئے کہا کہ دہشتگردی کے خلاف جاری اس طویل جنگ میں قوم اپنے بہادر سپاہیوں کے لہو کا قرض ہمیشہ یاد رکھے گی۔ ان کا کہنا تھا کہ بیرونی سرپرستی میں سرگرم دہشتگرد عناصر کے مذموم اور ناپاک عزائم پاکستان میں کبھی کامیاب نہیں ہو سکتے۔
یہ بھی پڑھیں:رینجرز کے جوان کراچی کے گل پلازہ میں لگنے والی آگ پر قابو پانے اور متاثرین کو بچانے کے لیے آپریشن میں مصروف
آصف علی زرداری نے اعادہ کیا کہ پوری پاکستانی قوم دہشتگردی کے جڑ سے خاتمے کے لیے اپنی سیکیورٹی فورسز اور قانون نافذ کرنے والے اداروں کے شانہ بشانہ کھڑی ہے، اور شہدا کا بہنے والا خون اس لعنت کے مکمل خاتمے کے قومی عزم کو مزید فولادی بناتا ہے۔
فتنہ الہندوستان کے عزائم خاک میں مل گئے، وزیراعظم شہباز شریف
وزیراعظم محمد شہباز شریف نے رینجرز کے کامیاب آپریشن کی تفصیلات پر گفتگو کرتے ہوئے بتایا کہ سیکیورٹی فورسز نے کمال بہادری کا مظاہرہ کرتے ہوئے 3 دہشتگردوں کو جہنم واصل کیا جبکہ 1 دہشتگرد کو زندہ گرفتار کرنے میں کامیابی حاصل کی۔
انہوں نے کہا کہ اس کارروائی سے فتنہ الہندوستان کے نیٹ ورک اور اس کے سرپرستوں کو بڑا دھچکا لگا ہے۔ وزیراعظم نے کہا کہ آپریشن کے دوران وطنِ عزیز پر اپنی جانیں نچھاور کرنے والے شہدا کو پوری قوم سلام پیش کرتی ہے۔
انہوں نے شہدا کے سوگوار اہل خانہ کے لیے صبرِ جمیل اور آپریشن میں زخمی ہونے والے رینجرز جوانوں کی جلد از جلد مکمل صحت یابی کے لیے دعا بھی کی۔
شہید جوان پوری قوم کے ہیرو ہیں، وزیر داخلہ محسن نقوی
وفاقی وزیر داخلہ محسن نقوی نے اپنے تعزیتی بیان میں کہا کہ کراچی میں بڑا حملہ ناکام بناتے ہوئے جامِ شہادت نوش کرنے والے رینجرز کے جوان پوری قوم کے اصل ہیرو ہیں۔
انہوں نے سخت وارننگ دیتے ہوئے کہا کہ شہدا کا خون کسی بھی صورت رائیگاں نہیں جائے گا اور ملک سے دہشتگردی کے ہر فتنے کا پوری ریاستی قوت سے خاتمہ کیا جائے گا۔
وزیر داخلہ نے دوٹوک الفاظ میں کہا کہ ‘فتنہ الہندوستان’ اور اس کے پیچھے چھپے ہوئے بیرونی سرپرست اپنے ناپاک عزائم میں کبھی سرخرو نہیں ہو سکتے، کیونکہ ہماری فورسز ہر وقت الرٹ ہیں۔
صوبائی دارالحکومت کراچی طویل عرصے سے بیرونی ایجنسیوں اور ان کے سہولت کاروں کے نشانے پر رہا ہے، جہاں سی پیک منصوبوں، سیکیورٹی تنصیبات اور قانون نافذ کرنے والے اداروں پر حملوں کی سازشیں کی جاتی رہی ہیں۔
‘فتنہ الہندوستان’ کی اصطلاح حالیہ دور میں ان دہشتگرد گروہوں کے لیے استعمال کی جا رہی ہے جنہیں سرحد پار سے مالی اور عسکری معاونت حاصل ہوتی ہے تاکہ پاکستان کے معاشی حب کراچی میں بدامنی پھیلائی جا سکے۔
رینجرز کی اس حالیہ کارروائی میں ایک دہشتگرد کا زندہ گرفتار ہونا پاکستان کے لیے ایک بڑی کامیابی ہے، کیونکہ اس سے حملے کے ماسٹر مائنڈز اور نیٹ ورک تک پہنچنے میں اہم انٹیلی جنس معلومات حاصل ہوں گی۔
کراچی میں رینجرز پر ہونے والے اس حملے کا ناکام ہونا اور سیکیورٹی فورسز کا فوری رسپانس یہ ظاہر کرتا ہے کہ شہر میں انٹیلی جنس اور بارڈر کنٹرول کا نظام انتہائی الرٹ ہے۔
صدارتی اور حکومتی بیانات میں ’فتنہ الہندوستان‘ اور ’بیرونی سرپرستی‘ جیسے الفاظ کا کھل کر استعمال کرنا اس بات کا واضح سفارتی اشارہ ہے کہ پاکستان اب سرحد پار سے ہونے والی پراکسی وار کو عالمی سطح پر بے نقاب کرنے کے لیے جارحانہ بیانیہ اپنائے ہوئے ہے۔
سیاسی اور اسٹریٹجک نقطۂ نظر سے، ایک دہشتگرد کا ’زندہ گرفتار‘ ہونا عسکری اداروں کے لیے ایک بہت بڑا بریک تھرو ہے۔
ماضی میں کلبھوشن یادو جیسے کیسز کی طرح، یہ زندہ گرفتار دہشتگرد بھی بین الاقوامی برادری کے سامنے دشمن ملک کی مداخلت کا ایک اور ناقابلِ تردید ثبوت بنے گا۔
وزیراعظم شہباز شریف اور وزیر داخلہ محسن نقوی کی جانب سے فوری طور پر رینجرز جوانوں کو ‘قوم کے ہیرو’ قرار دینا فورسز کے مورال کو بلند رکھنے کے لیے انتہائی اہم ہے، کیونکہ کراچی کی معاشی ترقی کا براہِ راست انحصار یہاں کے امن و امان پر ہے۔
By 
