جیو ڈاکیومنٹری تنازع ، بروقت معذرت نے معاملہ سنگین ہونے سے بچا لیا، سینئرصحافی طلعت حسین

سینئر صحافی اور تجزیہ نگار طلعت حسین کا کہنا ہے کہ جیو ڈاکیومنٹری تنازع مزید سنگین ہو سکتا تھا لیکن بروقت معذرت نے حالات کو سنبھال لیا۔

جیو کی متنازع ڈاکیومنٹری کے معاملے پر سماجی رابطے کی ویب سائٹ ایکس پر ایک ٹویٹ میں طلعت حسین نے کہا کہ اگرچہ چینل کے خلاف کارروائی، وارننگز اور یوٹیوب چینل کی بندش جیسے اقدامات بظاہر تشویش کا باعث ہیں، تاہم عوامی صورتحال اس سے کہیں زیادہ سنگین بھی ہو سکتی تھی۔

تجزیہ کار طلعت حسین نے کہا کہ اگر بروقت انتظامی کارروائی نہ ہوتی تو معاملہ عوامی سطح پر مزید شدت اختیار کر سکتا تھا اور ایسے ردعمل سامنے آ سکتے تھے جو کسی کے بھی کنٹرول سے باہر ہوتے۔

Now there is Admn action which can be remedied. Geo’s swift apology and compliance has prevented the controversy from escalating. A combustible situation is being defused. Hopefully, with the right lessons learnt, things will eventually calm down. May take sometime though.

— Syed Talat Hussain (@TalatHussain12) June 28, 2026

ان کا کہنا ہے کہ اس وقت معاملہ انتظامی سطح پر موجود ہے، جس کا قانونی اور ضابطہ کے تحت طریقہ کار سے حل نکالا جا سکتا ہے، چینل جیو کی جانب سے فوری معذرت اور متعلقہ ہدایات پر عمل درآمد نے تنازع کو مزید بڑھنے سے روکنے میں اہم کردار ادا کیا۔

یہ بھی پڑھیں :جیو نیوز لائسنس معطل, ملک بھر میں کیبل آپریٹرز فوری طور پر چینل بند کر دیں،پیمرا

صحافی طلعت حسین کے مطابق بروقت ردعمل کے باعث ایک حساس اور اشتعال انگیز صورتحال کو کسی حد تک ٹھنڈا کرنے میں مدد ملی ہے۔

ان کا کہنا ہے کہ اگر اس واقعے سے مناسب سبق سیکھا گیا اور مستقبل میں احتیاط برتی گئی تو وقت کے ساتھ حالات معمول پر آ سکتے ہیں، اگرچہ اس عمل میں کچھ وقت لگ سکتا ہے، امید ہے کہ چیزیں بالآخر پرسکون ہو جائیں گی۔

واضح رہے کہ پیمرا نے جیو نیوز کے خلاف بڑا ریگولیٹری اقدام کرتے ہوئے چینل کا لائسنس فوری طور پر 15 روز کے لیے معطل کر دیا ہے اور ملک بھر کے تمام کیبل آپریٹروں اور نشریاتی تقسیم کاروں کو جیو نیوز کی نشریات بند کرنے کی ہدایت جاری کر دی ہے۔