مکہ مکرمہ : آب زمزم اور عرق گلاب سے غسل کعبہ کی روح پرور تقریب کا انعقاد

مکہ مکرمہ میں مسجدالحرام میں ہزاروں من عرق گلاب اور آب زمزم سے غسل خانہ کعبہ کی روح پرور تقریب منعقد ہوئی۔

یہ بابرکت روایت عہدِ نبوی ﷺ سے جاری ہے اور ہر سال انتہائی عقیدت و احترام کے ساتھ ادا کی جاتی ہے ، نمازِ فجر کے بعد خانہ کعبہ کے اندرونی حصے کی دیواروں اور فرش کو آبِ زم زم، عرق گلاب اور خالص عود سے معطر پانی کے ذریعے غسل دیا جاتا ہے۔

مسجدالحرام میں غسل کعبہ کی روح پرور سالانہ تقریب  میں غیرملکی سفارت کار، او آئی سی اراکین، علماء مشائخ اور دیگر اہم شخصیات نے شرکت کی۔

یہ بھی پڑھیں :اذان نے زندگی بدل دی، اطالوی نوجوان مسلمان ہو کر حج کی ادائیگی میں مصروف

غسل کعبہ کی سالانہ تقریب میں خادم الحرمین الشریفین کی نیابت کرتے ہوئے گورنر مکہ شہزادہ سعود بن مشعل نماز فجر کے بعد غسل کعبہ کی تقریب میں شریک ہوئے۔

اس دوران زائرین کی محدود تعداد طواف میں مصروف رہی جبکہ سکیورٹی کے سخت انتظامات کیے گئے تھے۔

یہ بھی پڑھیں :خانہ کعبہ کا نیا غلاف کلید برداروں کے حوالے ، یکم محرم کو تبدیل کیا جائے گا

اس کے علاوہ کسوہ کی حفاظت کے پیش نظر غسل کے عمل کے دوران کعبہ کے دروازے کے پردے کو اٹھا دیا گیا تھا تاکہ کعبہ کے اندر باآسانی رسائی حاصل کی جاسکے۔

غسلِ کعبہ صرف ایک مذہبی رسم نہیں بلکہ امتِ مسلمہ کے لیے محبت، احترام اور بیت اللہ سے والہانہ وابستگی کی علامت ہے۔