فائیو جی ٹیکنالوجی کا کمال، ہزاروں کلومیٹر دور بیٹھ کر پھیپھڑے کی سرجری

چین میں طب کے شعبے میں ایک اہم پیش رفت سامنے آئی ہے، جہاں ایک سرجن نے اپنے شہر سے باہر جائے بغیر تقریباً 5 ہزار کلومیٹر دور موجود مریضہ کے پھیپھڑے سے رسولی کامیابی سے نکال دی۔

رپورٹس کے مطابق، 13 جولائی 2024 کو شنگھائی چیسٹ ہسپتال کے سرجن ڈاکٹر لو چنگ چوان نے شنگھائی میں موجود روبوٹک سرجیکل کنسول سے آپریشن کیا، جبکہ مریضہ چین کے مغربی علاقے سنکیانگ کے شہر کاشغر میں واقع سیکنڈ پیپلز ہسپتال میں زیرِ علاج تھیں۔

سرجری کے دوران مقامی طور پر تیار کردہ 5G روبوٹک سرجیکل سسٹم استعمال کیا گیا، جس نے ڈاکٹر لو کے ہاتھوں کی ہر حرکت کو حقیقی وقت  میں تقریباً 5 ہزار کلومیٹر دور موجود روبوٹک بازوؤں تک منتقل کیا۔

یہ بھی پڑھیں :تتلی نے سائنس دانوں کو سکھا دیا بجلی بنانے کا نیا طریقہ

مریضہ کے دائیں پھیپھڑے کے اوپری حصے میں موجود رسولی کی تشخیص تین سال قبل ہوئی تھی۔ طبی معائنے اور دور سے کیس کا جائزہ لینے کے بعد ماہرین نے انہیں اس جدید طریقۂ علاج کے لیے موزوں قرار دیا۔

یہ منفرد آپریشن کئی ماہ کی تیاری کے بعد ممکن ہوا۔ دونوں ہسپتالوں نے ایک سال سے زائد عرصے تک منصوبہ بندی کی، جس میں جانوروں پر تجربات، حفاظتی جائزے، اخلاقی منظوری اور دونوں طبی ٹیموں کے درمیان متعدد مشترکہ مشاورتی اجلاس شامل تھے۔

یہ بھی پڑھیں:کیا دنیا کی گھڑیوں سے ایک سیکنڈ غائب ہونے والا ہے؟ ماہرین نے بتا دی

آپریشن کے دوران ڈاکٹر لو نے ہائی ڈیفینیشن تھری ڈی ویژن اور فٹ پیڈلز کی مدد سے روبوٹک بازوؤں اور کیمرے کو کنٹرول کیا، جبکہ کاشغر میں موجود ڈاکٹر چن تیان شیانگ اور ڈاکٹر ہوانگ جیا نے مقامی طبی ٹیم کی قیادت کرتے ہوئے پورے عمل کے دوران براہ راست تعاون فراہم کیا۔

ماہرین کے مطابق، اس کامیاب سرجری نے ثابت کیا ہے کہ 5G اور روبوٹک ٹیکنالوجی کی مدد سے مستقبل میں دور دراز علاقوں کے مریض بھی عالمی معیار کی طبی سہولیات سے مستفید ہو سکیں گے، خصوصاً ایسے علاقوں میں جہاں ماہر سرجنوں کی دستیابی محدود ہو۔