بھارت میں مودی سرکار کے خلاف نوجوانوں کی احتجاجی تحریک ’کاکروچ پارٹی‘ کے نئی دہلی کے معروف احتجاجی مرکز ’جنتر منتر‘ سے ایک ایسی ویڈیو وائرل ہوئی ہے جس میں نوجوانوں نے پاکستان کے فیلڈ مارشل سید عاصم منیر کی زبردست تعریفیں کی ہیں۔
احتجاج میں شریک طلبہ نے ’بنیان مرصوص‘ کے تناظر میں فیلڈ مارشل سید عاصم منیر کی حکمت عملی کو سراہتے ہوئے مودی سرکار کی ناکامیوں کو شدید تنقید کا نشانہ بنایا ہے۔
احتجاج کا مرکز اور طلبا کا ردعمل
نئی دہلی کے قلب میں واقع جنتر منتر پر ہونے والے ایک احتجاج کے دوران غیر متوقع مناظر دیکھنے میں آئے، جہاں نوجوانوں نے ملکی سیاست سے ہٹ کر بین الاقوامی سطح پر پاکستان کی عسکری قیادت کی تعریف شروع کر دی۔ سوشل میڈیا پر وائرل ہونے والی ویڈیو میں دیکھا جا سکتا ہے کہ احتجاج میں شامل طلبہ مودی حکومت کی پالیسیوں سے سخت نالاں ہیں۔
بنیان مرصوص مودی کو ملنے والا ’سبق
ویڈیو میں بات کرنے والے شخص کا کہنا ہے کہ ’بنیان مرصوص‘ کے دوران فیلڈ مارشل سید عاصم منیر نے جس طرح اپنی قوم اور خطے کے مفادات کا تحفظ کیا، اس نے مودی سرکار کو ہلا کر رکھ دیا ہے۔
طلبا کے مطابق اگر یہ عمل کچھ وقت اور جاری رہتا تو مودی حکومت کی ساکھ مکمل طور پر ختم ہو جاتی۔ ان کا یہ بھی کہنا تھا کہ موجودہ بھارتی قیادت خطے میں اپنے ہی لوگوں کی توقعات پر پورا اترنے میں ناکام رہی ہے۔
’پاکستان پائندہ باد‘ کے نعرے
ویڈیو کے آخر میں، جس میں احتجاج کے شرکا مودی حکومت کو تنقید کا نشانہ بنا رہے تھے، وہاں ’فیلڈ مارشل سید عاصم منیر زندہ آباد‘ اور ’پاکستان پائندہ باد‘ کے نعرے بھی لگائے گئے۔
واضح رہے کہ یہ ویڈیو ایک ایسے وقت میں سامنے آئی ہے جب بھارت میں اندرونی طور پر معاشی بدحالی اور عوامی احتجاج میں تیزی دیکھی جا رہی ہے۔
تجزیہ کاروں کا ماننا ہے کہ نوجوان طبقہ، جو سوشل میڈیا کے ذریعے براہِ راست معلومات حاصل کر رہا ہے، اب سرکاری بیانیے کو مسترد کر رہا ہے۔
’بنیان مرصوص‘ کو پاکستان کی ایک بڑی اسٹرٹیجک کامیابی کے طور پر دیکھا جا رہا ہے، جس کے اثرات اب بھارت کی نوجوان نسل پر بھی مرتب ہو رہے ہیں۔
اس واقعے کا سب سے اہم پہلو یہ ہے کہ بھارتی نوجوانوں کا ایک گروہ اب متبادل بیانیے کی تلاش میں ہے۔ یہ احتجاج نہ صرف مودی سرکار کی خارجہ پالیسی کی ناکامی کا ثبوت ہے بلکہ اس بات کی بھی عکاسی کرتا ہے کہ خطے میں ’فیلڈ مارشل سید عاصم منیر‘ کا قد کاٹھ ایک ایسے عسکری رہنما کے طور پر ابھرا ہے جو طاقت کا توازن برقرار رکھنے کی صلاحیت رکھتا ہے۔
