عالمی منڈی میں سونے کی قیمتوں میں ہفتے کے آغاز پر نمایاں کمی ریکارڈ کی گئی ہے کیونکہ سرمایہ کاروں نے امریکی مرکزی بینک فیڈرل ریزرو کے آئندہ شرحِ سود کے فیصلے سے قبل محتاط حکمت عملی اختیار کر لی ہے۔
غیر ملکی میڈیا رپورٹس کے مطابق عالمی مارکیٹ میں سونے کی قیمت میں تقریباً 0.8 فیصد کمی واقع ہوئی جس کے بعد فی اونس قیمت تقریباً 4,040 امریکی ڈالر تک آ گئی۔ اس کمی کے نتیجے میں گزشتہ تجارتی سیشن کے دوران ہونے والا معمولی اضافہ بھی ختم ہو گیا اور سرمایہ کار دوبارہ محتاط رویہ اختیار کرتے دکھائی دیے۔
معاشی تجزیہ کاروں کے مطابق سرمایہ کار اس وقت فیڈرل ریزرو کی آئندہ مالیاتی پالیسی پر گہری نظر رکھے ہوئے ہیں۔ ایک طرف امریکا میں جون کے دوران مہنگائی کی شرح توقعات سے کم رہی جس سے شرح سود میں نرمی کی امید پیدا ہوئی جبکہ دوسری جانب امریکا اور ایران کے درمیان حالیہ کشیدگی کے باعث تیل کی قیمتوں میں ہونے والے اضافے نے افراطِ زر کے خدشات کو ایک بار پھر بڑھا دیا ہے۔ یہی متضاد عوامل فیڈرل ریزرو کے لیے شرح سود کے حوالے سے فیصلہ مزید پیچیدہ بنا رہے ہیں۔
ادھر مشرقِ وسطیٰ میں کشیدگی میں وقتی کمی کے باعث سرمایہ کاروں کی محفوظ سرمایہ کاری کے طور پر سونے میں دلچسپی بھی کچھ کم ہوئی جس سے قیمتوں پر دباؤ آیا۔ ماہرین کا کہنا ہے کہ جب عالمی سیاسی یا معاشی غیر یقینی صورتحال میں کمی آتی ہے تو سرمایہ کار نسبتاً زیادہ منافع والے اثاثوں کا رخ کرتے ہیں، جس کے نتیجے میں سونے کی طلب اور قیمت دونوں متاثر ہوتی ہیں۔
تجزیہ کاروں کے مطابق بدھ کو فیڈرل ریزرو کی جانب سے شرحِ سود سے متعلق اعلان چیئرمین کے پالیسی بیان اور آئندہ مہینوں کے حوالے سے دی جانے والی رہنمائی عالمی منڈیوں کے لیے انتہائی اہم ہوگی۔ اگر شرح سود میں کمی کے اشارے ملتے ہیں تو سونے کی قیمتوں میں دوبارہ تیزی آ سکتی ہے، جبکہ سخت مالیاتی پالیسی برقرار رکھنے کی صورت میں سونے پر مزید دباؤ پڑنے کا امکان موجود ہے۔
ماہرین کا کہنا ہے کہ عالمی منڈی میں سونے کی قیمتوں میں اتار چڑھاؤ کے اثرات پاکستان سمیت دیگر ممالک کی مقامی صرافہ مارکیٹوں پر بھی مرتب ہوتے ہیں۔ اگر عالمی قیمتوں میں کمی کا رجحان برقرار رہا اور ڈالر کی قدر میں نمایاں اضافہ نہ ہوا تو مقامی مارکیٹ میں بھی سونے کی قیمتوں میں کمی دیکھی جا سکتی ہے
