سیف علی خان کی پاکستانی ڈرامے میں انٹری؟ اصل کہانی سامنے آگئی

بالی ووڈ اداکار سیف علی خان کے پاکستانی ڈرامے میں کام کرنے کی خبر سوشل میڈیا پر تیزی سے پھیلی تاہم حقیقت سامنے آنے پر معلوم ہوا کہ یہ صرف ایک غلط فہمی تھی۔

یہ معاملہ اس وقت شروع ہوا جب وکی پیڈیا پر پاکستانی ڈرامہ ’آپ کی عزت‘ کے صفحے پر سیف علی خان کا نام مرکزی اداکاروں احسن خان، عروہ حسین اور ثانیہ سعید کے ساتھ درج نظر آیا۔ اس معلومات کو دیکھ کر کئی صارفین نے قیاس آرائیاں شروع کر دیں کہ شاید سیف علی خان پاکستانی ڈرامہ انڈسٹری کا حصہ بننے جا رہے ہیں۔

وکی پیڈیا پر غلط اندراج کیسے ہوا؟

بعد ازاں واضح ہوا کہ سیف علی خان کا اس پاکستانی ڈرامے سے کوئی تعلق نہیں۔ وکی پیڈیا پر کسی صارف کی جانب سے کی گئی غلط ترمیم یا معلوماتی ڈیٹا میں خرابی کے باعث بھارتی اداکار کا نام ڈرامے کی کاسٹ میں شامل ہو گیا تھا جسے بعد میں درست کر دیا گیا۔

 یہ بھی پڑھیں :حملہ آور گھر میں کیسے داخل ہوا؟ سیف علی خان نے پوری کہانی سنا دی

سوشل میڈیا پر دلچسپ تبصرے

سیف علی خان کے نام کے غلط اندراج نے سوشل میڈیا پر دلچسپ تبصروں کا سلسلہ شروع کر دیا۔ کچھ صارفین نے مذاق میں کہا کہ “آخرکار سیف علی خان پاکستانی ڈراموں میں آ ہی گئے”، جبکہ بعض نے اسے پاکستان اور بھارت کی شوبز انڈسٹری کے درمیان ممکنہ تعاون قرار دے دیا۔

کئی صارفین نے اس خبر پر مزاحیہ میمز بھی شیئر کیں اور اسے “ہائی بجٹ پاکستانی ڈرامہ” قرار دیا۔

نام کی مماثلت بنی اصل وجہ

رپورٹس کے مطابق اس غلط فہمی کی ایک بڑی وجہ نام کی مماثلت بنی۔ پاکستانی ڈرامہ ’آپ کی عزت‘ میں ایک اداکار کا نام بھی سیف علی خان ہے، جو پاکستانی شوبز انڈسٹری سے تعلق رکھتے ہیں۔ اسی مماثلت کے باعث بھارتی اداکار سیف علی خان کی معلومات غلطی سے ڈرامے کے صفحے سے منسلک ہو گئیں۔

 یہ بھی پڑھیں :سیف علی خان نے فلم میں ہوں نا سے جڑی بڑی حقیقت بتا دی

سیف علی خان کا پاکستانی ڈرامے سے کوئی تعلق نہیں

واضح رہے کہ بالی ووڈ کے معروف اداکار سیف علی خان کا پاکستانی ڈرامہ ’آپ کی عزت‘ سے کوئی پیشہ ورانہ تعلق نہیں۔ وہ بھارتی فلم انڈسٹری کے نمایاں اداکار ہیں اور ’دل چاہتا ہے‘، ’کل ہو نہ ہو‘، ’اومکارا‘ اور ’ریس‘ جیسی کامیاب فلموں میں اداکاری کر چکے ہیں۔