دنیا کی مہنگی ترین طلاق,سابقہ بیوی کے حق میں 184 ارب روپےکا فیصلہ

جنوبی کوریا کی عدالت نے معروف کاروباری شخصیت اور میموری چپس بنانے والی کمپنی ایس کے ہائنکس کے چیئرمین چی تے وون کو اپنی سابقہ اہلیہ رو سو یونگ کو طلاق کے تصفیے کے تحت 644 ملین ڈالر جو کہ 184 ارب پاکستانی روپے بنتے ہیں ادا کرنے کا حکم دے دیا۔

غیر ملکی میڈیا رپورٹس کے مطابق اس فیصلے کو جنوبی کوریا کی تاریخ ہی نہیں بلکہ گزشتہ ایک صدی کی مہنگی ترین طلاقوں میں شمار کیا جا رہا ہے۔

یہ بھی پڑھیں:دنیا کا منفرد ترین قصبہ، جہاں گھر دو ملکوں میں واقع ، لوگ کھانا پکاتے ایک ملک اور کھاتے دوسرے ملک میں ہیں

میڈیا رپورٹس کے مطابق 65 سالہ چی تے وون اور رو سو یونگ کے درمیان قانونی تنازع کئی برسوں سے جاری ہے۔ اس سے قبل 2024 میں سیول ہائی کورٹ نے چی تے وون کو سابقہ اہلیہ کو 940 ملین ڈالر ادا کرنے کا حکم دیا تھا، تاہم انہوں نے اس فیصلے کے خلاف سپریم کورٹ سے رجوع کیا۔

سپریم کورٹ نے اپیل پر سماعت کے بعد رقم میں کمی کرتے ہوئے فیصلہ دیا کہ رو سو یونگ کو جوڑے کے مشترکہ ازدواجی اثاثوں کے تقریباً ایک تہائی کے برابر، یعنی 644 ملین ڈالر نقد ادا کیے جائیں۔

یہ بھی پڑھیں :مراکش نے 650 میل طویل شاہراہ امریکی صدر ڈونلڈ ٹرمپ کے نام کر دی

مقامی میڈیا نے اس فیصلے کو ’’صدی کی سب سے مہنگی طلاق‘‘ قرار دیا ہے، تاہم قانونی ماہرین کے مطابق یہ فیصلہ ابھی حتمی نہیں، کیونکہ دونوں فریق دوبارہ سپریم کورٹ میں اپیل دائر کرنے کا حق رکھتے ہیں۔

چی تے وون اور رو سو یونگ کی شادی 1988 میں ہوئی تھی۔ اس وقت رو سو یونگ کے والد رو تے وو جنوبی کوریا کے صدر تھے۔ دونوں کے درمیان اختلافات کے بعد چی تے وون نے 2017 میں ثالثی کی کوشش ناکام ہونے پر عدالت سے طلاق کی درخواست دائر کی، جبکہ 2022 سے یہ مقدمہ مختلف عدالتوں میں زیر سماعت رہا۔