بیرونِ ملک سے موبائل فون منگوانے یا پاکستان لانے کے خواہشمند افراد کے لیے اہم پیش رفت سامنے آئی ہے۔ حکومت نے فنانس ایکٹ 2026 کے تحت درآمدی موبائل فونز پر عائد PTA ٹیکس قسطوں میں ادا کرنے کی اجازت دے دی ہے جس کا مقصد صارفین پر یکمشت مالی بوجھ کم کرنا ہے۔ تاہم اس سہولت کے مکمل طریقۂ کار اور شرائط کا سرکاری نوٹیفکیشن ابھی جاری ہونا باقی ہے۔
حکام کے مطابق نئی سہولت نئے اور استعمال شدہ دونوں درآمدی موبائل فونز پر لاگو ہوگی تاہم صارفین کو مقررہ مدت کے اندر مکمل ٹیکس ادا کرنا ہوگا۔ اس اقدام سے بالخصوص مہنگے اسمارٹ فونز خصوصاً آئی فون اور فلیگ شپ اینڈرائیڈ فونز خریدنے والے صارفین کو ریلیف ملنے کی توقع ہے۔
ابھی مکمل طریقۂ کار جاری نہیں ہوا
اگرچہ قانون کے تحت قسطوں میں ادائیگی کی منظوری دی جا چکی ہے لیکن متعلقہ اداروں کی جانب سے ابھی تک اس سہولت کے ایس او پیز، اقساط کی تعداد، بینکوں کے طریقۂ کار اور اہلیت کی شرائط جاری نہیں کی گئی ہیں۔ اسی لیے صارفین کو مشورہ دیا جا رہا ہے کہ صرف سرکاری اعلان کے بعد ہی اس سہولت سے متعلق کسی دعوے پر یقین کریں۔
پاکستان ٹیلی کمیونیکیشن اتھارٹی (PTA) پہلے بھی واضح کر چکی ہے کہ سوشل میڈیا پر گردش کرنے والی بعض جعلی اطلاعات میں دعویٰ کیا گیا تھا کہ DIRBS سسٹم کے ذریعے فوری طور پر قسطوں میں ٹیکس جمع کرایا جا سکتا ہے حالانکہ ایسی اطلاعات درست نہیں تھیں۔ PTA نے عوام سے اپیل کی ہے کہ صرف سرکاری ذرائع سے جاری ہونے والی معلومات پر اعتماد کیا جائے۔
صارفین کو کیا فائدہ ہوگا؟
ماہرین کے مطابق اس فیصلے سے وہ افراد زیادہ فائدہ اٹھا سکیں گے جو مہنگے درآمدی موبائل فون خریدنے کی استطاعت تو رکھتے ہیں لیکن ایک ساتھ بھاری PTA ٹیکس ادا کرنا ان کے لیے مشکل ہوتا ہے۔ قسطوں کی سہولت سے قانونی رجسٹریشن کی حوصلہ افزائی ہوگی اور غیر رجسٹرڈ فونز کے استعمال میں بھی کمی آ سکتی ہے۔
ماہرین کا کہنا ہے کہ درآمدی موبائل خریدنے سے پہلے متعلقہ فون پر عائد PTA ٹیکس رجسٹریشن کی اہلیت اور تازہ ترین قواعد ضرور چیک کریں۔ صارفین *8484# ڈائل کرکے یا PTA کے سرکاری پورٹل کے ذریعے اپنے موبائل کی رجسٹریشن اور ٹیکس کی معلومات حاصل کر سکتے ہیں۔
حکام کا کہنا ہے کہ جیسے ہی قسطوں میں ادائیگی کے طریقۂ کار کا باضابطہ نوٹیفکیشن جاری ہوگا اس کی تمام تفصیلات عوام کے لیے جاری کر دی جائیں گی۔
