مون سون میں بارش کے بعد نکلنے والے پتنگوں سے کیسے بچیں؟ آسان طریقہ جانئے

مون سون کی بارشیں جہاں موسم کو خوشگوار بناتی ہیں، وہیں بارش کے بعد کیڑوں اور مختلف حشرات کی سرگرمی میں بھی اضافہ ہو جاتا ہے۔ پاکستان میں پانی جمع ہونے، صفائی کے ناقص انتظامات اور مرطوب موسم کے باعث بارش کے بعد متعدد اقسام کے حشرات گھروں کا رخ کرنے لگتے ہیں، جو شہریوں کے لیے پریشانی کا باعث بن سکتے ہیں۔

بارش کے بعد اکثر چھوٹے سیاہ کیڑے، جنہیں عام طور پر پتنگے کہا جاتا ہے، گھروں کی روشنیاں اور بلب کے گرد بڑی تعداد میں منڈلاتے دکھائی دیتے ہیں۔ بعض حشرات کے کاٹنے سے جلد پر خارش، جلن اور دیگر تکالیف ہوسکتی ہیں، جبکہ مچھروں سمیت کچھ حشرات مختلف بیماریوں کی منتقلی کا ذریعہ بھی بن سکتے ہیں۔

ماہرین کے مطابق بارش کے موسم میں گھر سے باہر نکلتے وقت مناسب حشرات بھگانے والی دوا یا ریپلینٹ کا استعمال مچھروں اور دیگر حشرات کے کاٹنے سے بچاؤ میں مددگار ہوسکتا ہے۔ بارش کے بعد حشرات کی سرگرمی بڑھنے کے باعث جسم کو ڈھانپ کر رکھنا اور غیر ضروری طور پر کھڑے پانی کے قریب جانے سے گریز کرنا بھی مفید ہے۔

گھروں میں حشرات کی آمد کم کرنے کے لیے بعض افراد کافور کی گولیاں بھی استعمال کرتے ہیں۔ کافور کی تیز خوشبو بعض حشرات کو دور رکھنے میں مدد دے سکتی ہے، تاہم اسے بچوں کی پہنچ سے دور رکھنا ضروری ہے۔

یہ بھی پڑھیں: ملک کے مختلف حصوں میں موسلا دھار بارش، متعدد علاقے زیر آب، این ڈی ایم اے کا ہنگامی الرٹ

اسی طرح ضرورت کے مطابق کیڑے مار اسپرے بھی استعمال کیا جاسکتا ہے، لیکن اسپرے کرتے وقت مصنوعات پر درج حفاظتی ہدایات پر عمل کرنا چاہیے۔ بچوں اور پالتو جانوروں کو اسپرے کیے گئے مقام سے دور رکھنا اور مناسب ہواداری یقینی بنانا بھی ضروری ہے۔

گھر کے ماحول کو صاف رکھنا حشرات کی افزائش روکنے کے لیے بنیادی اہمیت رکھتا ہے۔ پودوں کی باقاعدگی سے صفائی، گملوں اور دیگر مقامات پر جمع پانی کی فوری نکاسی اور گھر کے اطراف صفائی کا خصوصی خیال رکھنا چاہیے، کیونکہ کھڑا پانی مچھروں کی افزائش کا سبب بن سکتا ہے۔

ماہرین شہریوں کو یہ بھی مشورہ دیتے ہیں کہ کھانے پینے کی اشیا کو ڈھانپ کر رکھا جائے، کچرا مناسب طریقے سے ٹھکانے لگایا جائے اور ڈسٹ بن کا ڈھکن بند رکھا جائے۔ گھر کے دروازوں اور کھڑکیوں پر جالی لگانے سے بھی حشرات کے اندر داخل ہونے کے امکانات کم کیے جاسکتے ہیں۔

یہ بھی پڑھیں: گرین انڈسٹریل اکنامک زون کی منظوری، وزیراعلیٰ پنجاب نے سرمایہ کاروں کو بڑا تحفہ دیدیا

مون سون کے دوران گھروں اور ان کے اطراف صفائی برقرار رکھنے، پانی جمع نہ ہونے دینے اور بنیادی احتیاطی تدابیر اختیار کرنے سے بارش کے بعد حشرات کی افزائش اور ان سے پیدا ہونے والی پریشانیوں کو بڑی حد تک کم کیا جاسکتا ہے۔