برطانیہ میں شدید گرمی نے 31 سالہ ریکارڈ توڑ دیا، بلیو الرٹ جاری

برطانیہ میں شدید گرمی کی پانچویں لہر نے 31 سالہ ریکارڈ توڑ دیا، ملک کے مختلف علاقوں میں درجہ حرارت مسلسل 30 ڈگری سینٹی گریڈ سے تجاوز کررہا ہے جبکہ شدید گرمی کے باعث ہیلتھ سیکیورٹی ایجنسی نے متعدد علاقوں کے لیے بلیو الرٹ جاری کردیا ہے۔

1995 میں برطانیہ میں مجموعی طور پر 34 دن ایسے ریکارڈ کیے گئے تھے جب درجہ حرارت 30 ڈگری سینٹی گریڈ سے زیادہ رہا جبکہ 2026 میں یہ تعداد بڑھ کر 35 دن ہوگئی ہے۔

 یہ بھی پڑھیں :برطانیہ اور یورپ میں ریکارڈ گرمی، شدید گرمی کی لہرسے 600 افراد ہلاک

محکمہ موسمیات کے مطابق آنے والے دنوں میں ایسٹ اینگلیا اور ساؤتھ ایسٹ کے علاقوں میں گرمی کی شدت مزید بڑھ سکتی ہے اور درجہ حرارت 36 ڈگری سینٹی گریڈ تک پہنچنے کا امکان ہے۔

شدید گرمی کے پیش نظر لندن، ایسٹ مڈلینڈز، ویسٹ مڈلینڈز، یارکشائر اور ہمبر کے لیے بلیو الرٹ جاری کیا گیا ہے۔

دوسری جانب برطانیہ میں شدید گرمی کے ساتھ خشک سالی کی صورتحال بھی برقرار ہے، جس کے باعث بعض علاقوں میں جنگلات میں آگ لگنے کے واقعات بھی پیش آئے ہیں۔

 یہ بھی پڑھیں :یورپ میں قیامت خیز گرمی، معمول سے ایک ہزار سے زائد اموات ریکارڈ

ماہرین کے مطابق رواں سال بار بار آنے والی گرمی کی لہروں اور غیر معمولی درجہ حرارت نے برطانیہ میں موسم کی شدت کے حوالے سے تشویش بڑھا دی ہے، جبکہ آنے والے دنوں میں درجہ حرارت اور موسمی صورتحال پر مسلسل نظر رکھی جارہی ہے۔