پی سی بی نے شائقین کرکٹ کو بڑی خوشخبری سنا دی، اہم اعلان

پاکستان کرکٹ بورڈ (پی سی بی) نے نیشنل چیمپئنز کپ 2026 کے لیے شائقین کرکٹ کو بڑی خوشخبری دیتے ہوئے ٹورنامنٹ کے تمام میچز میں داخلہ مفت رکھنے کا اعلان کردیا ہے۔

پی سی بی کے مطابق نیشنل چیمپئنز کپ کے تمام 7 میچز 11 سے 18 اگست تک ملتان کرکٹ اسٹیڈیم میں کھیلے جائیں گے اور شائقین بغیر کسی ٹکٹ کے اسٹیڈیم میں آکر میچز سے لطف اندوز ہوسکیں گے۔

تمام میچز ڈے نائٹ ہوں گے

پاکستان کرکٹ بورڈ کے مطابق ٹورنامنٹ کے تمام میچز ڈے نائٹ ہوں گے جبکہ ہر میچ کا آغاز دوپہر 3 بجے ہوگا۔

پی سی بی کی جانب سے شائقین کو مفت داخلے کی سہولت فراہم کرنے کا مقصد ڈومیسٹک کرکٹ کو فروغ دینا اور زیادہ سے زیادہ شائقین کو اسٹیڈیم میں آکر نوجوان اور قومی سطح کے کھلاڑیوں کو ایکشن میں دیکھنے کا موقع فراہم کرنا ہے۔

 یہ بھی پڑھیں :پی سی بی کو بڑا قانونی ریلیف، کھلاڑیوں کے مالی معاہدوں کی تفصیلات خفیہ رکھنے کا حکم

چار ٹیمیں ٹائٹل کے لیے مدمقابل

نیشنل چیمپئنز کپ میں مجموعی طور پر چار ٹیمیں حصہ لے رہی ہیں، جن میں پاکستان گرینز، پاکستان وائٹس، پاکستان بلوز اور پاکستان گولڈ شامل ہیں۔

ٹورنامنٹ سنگل لیگ راؤنڈ رابن فارمیٹ کے تحت کھیلا جائے گا، جس میں ہر ٹیم دیگر ٹیموں کے خلاف میچ کھیلے گی۔ لیگ مرحلے کے اختتام پر پوائنٹس ٹیبل پر سرفہرست رہنے والی دو ٹیمیں فائنل میں مدمقابل ہوں گی۔

قومی کرکٹ کے اہم کھلاڑی کپتان مقرر

ٹورنامنٹ کے لیے چاروں ٹیموں کی قیادت قومی کرکٹ کے نمایاں کھلاڑیوں کو سونپی گئی ہے۔پاکستان گولڈ کی قیادت فاسٹ بولر شاہین شاہ آفریدی کریں گے، جبکہ پاکستان گرینز کے کپتان آل راؤنڈر شاداب خان ہوں گے۔

اسی طرح پاکستان وائٹس کی قیادت جارح مزاج بلے باز صائم ایوب کو سونپی گئی ہے، جبکہ پاکستان بلوز کی کپتانی صاحبزادہ فرحان کریں گے۔

چاروں ٹیموں میں شامل کھلاڑیوں کے درمیان بہترین کارکردگی دکھانے کے لیے سخت مقابلے کی توقع کی جا رہی ہے، جبکہ ٹورنامنٹ نوجوان اور ابھرتے ہوئے کھلاڑیوں کے لیے اپنی صلاحیتوں کے اظہار کا بھی اہم موقع ہوگا۔

44 کھلاڑیوں کے اسکواڈز، 13 ریزرو کھلاڑی بھی شامل

پی سی بی نے نیشنل چیمپئنز کپ کے لیے مجموعی طور پر 44 کھلاڑیوں پر مشتمل اسکواڈز کا اعلان کیا ہے، جبکہ 13 ریزرو کھلاڑی بھی اسکواڈز کا حصہ ہوں گے۔

ٹورنامنٹ میں قومی اور ڈومیسٹک کرکٹ میں نمایاں کارکردگی دکھانے والے کھلاڑیوں کو ایکشن میں دیکھنے کا موقع ملے گا، جس سے سلیکٹرز کو مستقبل کے لیے باصلاحیت کھلاڑیوں کی کارکردگی کا جائزہ لینے میں بھی مدد ملے گی۔

 یہ بھی پڑھیں :پی ایس ایل بنے گی دنیا کی نمبر ون لیگ، چیئرمین پی سی بی محسن نقوی کا اہم اعلان

ڈومیسٹک سیزن کا آغاز

نیشنل چیمپئنز کپ 2026-27 کے ڈومیسٹک کرکٹ سیزن کا آغاز بھی ہوگا۔ پی سی بی کی جانب سے اس ٹورنامنٹ کو قومی ٹیم کے لیے نئے ٹیلنٹ کی تلاش اور کھلاڑیوں کی کارکردگی جانچنے کے حوالے سے اہم قرار دیا جا رہا ہے۔

ٹورنامنٹ کو 2027 کے آئی سی سی ورلڈ کپ کی تیاریوں کے تناظر میں بھی اہمیت حاصل ہے۔ ڈومیسٹک سطح پر کھلاڑیوں کی کارکردگی قومی سلیکشن کے عمل میں اہم کردار ادا کرسکتی ہے۔

ملتان کرکٹ اسٹیڈیم میں ہونے والے نیشنل چیمپئنز کپ کے تمام میچز میں مفت داخلے کے اعلان کے بعد شائقین کو بڑی تعداد میں اسٹیڈیم پہنچنے اور ڈومیسٹک کرکٹ کے سنسنی خیز مقابلوں سے براہ راست لطف اندوز ہونے کا موقع ملے گا۔